Dili – Molok atu selebra loron ne’ebé kreda dedika hodi hanoin fali loron martíriu S. João Batista nian ne’ebé monu iha loron 29 fulan Agostu, sarani sira husi Suku Daisoli, Parókia Aileu halo preparasaun ruma molok atu selebra loron ida ne’e. S.  João Batista mak padroeiru ba estasaun misionária Daisoli, no pároku deside halo festa ne’e, la’ós iha loron 24 Juñu, loron Kreda selebra S. João Batista nia moris maibé loron ninia martíriu nian.

 Pe. Mouzinho  Lopes Pr,  konvida Irmán sira husi Komunidade FMA Balide atu ajuda fó formasaun ba sarani sira iha fatin ne’ebá. Nune’e, Ir. Simoa, Ir. Dolores, Ir. Armenia, hamutuk ho Animadór/a na’in  5, ba iha fatin ne’ebá iha loron 27 meiu-dia to’o loron ne’ebé selebra loron ba Martiriu S. João Batista, ho objetivu atu tulun iha formasaun ida ne’e. Maibé Maromak hakarak buat seluk husi Irmán  sira ne’e, tanba buat hotu ne’ebé  planu atu bele hala’o iha fatin ne’ebá labele realiza, ho razaun tanba destinatáriu sira ne’ebé atu simu  formasaun ne’e menus liu ka bele sura ho liman-fuan.

Ba razaun ne’e, ami troka fali apostoladu hodi bá vizita no lori Jezús nia Isin ba ema moras sira. Maski labele realiza buat ne’ebé  planu hamutuk maibé  ami sente kontente tanba bele halo misaun seluk hanesan vizita ema moras no família sira ne’ebé presiza. Sira sente kontente liu atu simu vizita husi Irmán no  animadór/a sira no rona kona-ba Maromak nia futar Lia, ba sira sente ne’e nu’udar esperiénsia ida ne’ebé halo sira sente hakfodak liu tamba durante ne’e laiha vizita hanesan ne’e husi Irmán sira seluk, dala ruma  Padre de’it mak mai no dala barak  liu Katekista mak nafatin prezente atu fo Jezús nia isin wainhira padre laiha. Ikusmai Ami hela iha ne’ebá  hodi hala’o misaun ne’e to’o selebra hamutuk ho sarani sira loron Martíriu ida-ne’e ho Misa solene ne’ebé dirigi husi Pe. Pároku, Pe. Henrique de Deus, hamutuk ho Pe. Mouzinho Lopes no Pe. Ricardino. Iha omilia, padre ko’alia oituan kona-ba oinsá sarani sira buka atu sai hanesan S.João Batista ne’ebe prepara dalan ba Jezús nia mai, hodi buka haka’as an atu sai hanesan nia ne’ebé hatene prepara fuan atu simu Jezús no hatudu dalan ba ema seluk ne’ebé hakarak hasoru Jezús. Dalan konkretu mak sai badinas atu moris fiar sarani hodi tuir misa loron domingu, la’ós de’it tempu festa.

Ami fila fali mai iha Dili iha dia 30 Agostu dadeer. Sira sente gratidaun ho ami nia prezensa no husu atu bele mai nafatin atu bele tulun sira iha sira nia moris espirituál liuhusi formasaun sira.