Dili – Iha sábadu ekolójiku ne’ebé Eskola Maria Auxiliadora hala’o iha kada fulan (sábadu dahuluk), ba fulan Marsu tanba iha ona tempu Kuarezma nia laran, estudante sira halo orasaun “via-Sakra ho Laudato Si’”.  Iha Via-Sakra ne’ebé hala’o ohin, 5 Marsu 2022,  estudente sira reza reflete Kristu nia terus no ita-nia uma-komún nia terus hamutuk ho ema kiak sira-nia hakilar, tanba abuzu sira halo hasoru kriasaun no kriatura hotu.

Porezemplu iha meditasaun dahuluk kona-ba Jezús nia kondenasaun ba mate ita reflete mós kona-ba kondenasaun ekonomia nian  (Daniela Finamore, GCCM Divest-Invest & European Programs Coordinator). Iha tentasaun forte ida iha ema ne’ebé dudu nia atu halai husi ninia responsabilidade sira. Kuaze koko atu la sente hilin sira nia todan, liuliu se refere ba ema seluk. Ema justu ne’ebé mate mós hanesan ne’e. Pilatos nia indiferensa marka mós ita-nia tempu kona-ba krime sira no injustisa sira ne’ebé mosu husi ekonomia ida ne’ebé estraga uma komún no ita-nia maluk sira. Indifererensa ida ne’e mai husi ta’uk atu la hanoin hanesan ema hotu, atu hamriik hamutuk ho ki’ik no kiak sira, tanba hamriik ho sira iha ninia folin, no folin karun. Nune’e, Pilatos ho ninia silénsiu entrega ema loos ba ema seluk atu hedi ba krús. Ita simu bolun, husi Sínodu Amazonas nian, atu suporta kampaña kontra grupu sira ne’ebé provoka dezastre ekólojiku iha Amazonas. Jezús husu mai ita aten-barani lialoos nian, atu kompromete an hodi la subar an, atu hamriik ho kiak sira hodi la ta’uk ema seluk nia juízu, atu promove justisa.

Aleinde atividade sira-ne’e, estudente sira mós iha asosiasuan ida-idak halo mós sira-nia empeñu ba semana dahuluk Kuarezma nian, no atividade ekolojia seluk hanesan, limpeza iha bairru sira besik eskola, resiklajen. Iha loraik grupu OPIAM senior no ki’ik-oan sira ba kuda ai-oan iha foho lolon sira ne’ebé iha Kalváriu, besik Gruta Na’i-Feto (Comoro).

(ComSoc FMATIN)