Liafuan “carnaval” mai husi lia-latin ‘carnem levare’ (“elimina ‘carne’/naan), karik mós hetan influénsia husi liafuan latin seluk ‘vale’ (adeus carne), basá indika refeisaun ne’ebé halo iha loron ikus Karnavál nian, molok Kuarta ‘Cinzas’, inísiu Kuarezma nian, tempu ba abstinénsia no jejún.

Karnavál  mak festa sira ne’ebé mosu iha sékulu VI mK, iha Grésia. Festa jentiu sira-nian halo iha Janeiru-Fevereiru, no tuir mitolojia, ho intensaun atu, ho ritu sira, kasu salan sira ne’ebé halo iha invernu ka tinan ne’ebé liu ona, no husu ba maromak sira fekundidade ba rai no prosperidade ba primavera no tinan foun.

Atu kasu salan antigu sira, porezemplu, sira halo sena oho boneku ida, ne’ebé depoizde halo nia funerál sira sunu.

Bainhira mosu Kristianizmu, nia hasoru kostume ka lisan jentiu sira-nian. Tanba Evanjellu la kontra demonstrasaun sira ksolok nian, naran katak la sala, misionáriu sira,  envezde kontra karnavál, sira buka halo selebrasaun ne’e iha valór kristaun, iha sentidu katak, hasai prátika superstisaun sira no mitolojia nian, no fó signifikadu kristaun.

Neineik-neineik, festa jentiu sira-nian troka ho solenidade Kristianizmu nian envezde mitu pagaun sira ne’ebé selebra iha 25 Dezembru, 6 Janeiru ka 2 Fevereiru. La’ós Igreja mak institui festa karnavál, maibé rekoñese fenómenu ne’ebé iha ona, no buka subordina ba prinsípiu sira Evanjellu nian. Nune’e, iha tempu karnavál, Igreja buka insentiva retiru espirituál sira no adorasaun iha lron sira molok Kuarta “Cinzas’, no habiit tempu Kuarezma.

Papa S. Gregório Magno (590-604) mak Papa dahuluk atu fó ba domingu ikus molok tama Kuarezma títulu “dominica ad carnes levandas”, ne’ebé hamosu liafuan “carneval” ka “carnaval”. Papa Paulo II, ne’ebé hadomi kultura no hahán di’ak mak hatama selebrasaun Karnavál iha sidade Roma, iha tinan 1468.

Iha estilu edukativu salezianu ita hakarak atu dezenvolve iha foin-sa’e sira sentidu ksolok nian ne’ebé kle’an. Nune’e mak iha Institutu FMA, husi Madre Mazzarello nia tempu kedas, nia la husik liu okaziaun sira atu haboot ksolok no oferese esperiénsia pozitiva festa no amizade nian. Nunee mak, bainhira nia sei hala’o asaun pastorál nu’udar “Figlia Imaccolata” nian, atu kontrasta baile públiku sira iha Mornese durante tempu Karnavál nian, FMI sira kria baile ida ba feto-raan sira hodi aluga  órgaun ika instrumentu muzikál ida, atu festa sai atrativa liután (Cronistoria I, 124-126. 140-142). Tan ne’e, mak iha ita-nia uma sira, ita mós konserva tradisaun selebra karnavál, ho intensaun atu kria espíritu família no promove ksolok no amizade loos.

JG