Cassa (Ainaro/TL) – Atividade Oratóriu husi uma Madre Rosetta Marchese. Loron ikus fulan Fevereiru ne’ebé lori ita besik ba tempu forte Kuarezma nian. Oratorianu sira, halibur hamutuk hodi reza ba Paz iha nasaun Ukraina no Rusia. Irmán Armenia sosializa oratorianu sira, atu aprende fahe labarik barak ne’ebé moris iha tauk no violensia funu, ne’ebé hahú harahun situasaun Ukraina nian, hodi simu Amu Papa Francisco nia mensajen atu reza maka’as ba paz.

Depoizde momentu orasaun nian, oaratoriano sira husi grupo sira ( Domingos Savio, Laura Vicuña, Don Bosco, Madre Mazzarello no grupo kiik-oan Magone). Halo Carnaval hamutuk hodi haksolok, hamnasa, haksoit, dansa ho grupu ida-idak nia kreatividade ne’ebé simpátiku liu.

Iha momentu Irmán Armenia esplika ba Oratorianu sira Kona ba Karnaval nia signifikado. No konvida oratorianu sira atu hakbesik an ba tempu forte, ne’ebé sei hahú iha Kuarta ‘Cinzas”. Hodi konvida sira atu aprende hadomi Maromak liu tan, no halo di’ak iha família, iha eskola, iha Igreija no iha fatin Oratóriu nian.

Iha surpreza ida, bainhira Irmán fó dadun boatarde ba oratorianu sira derepenti kareta ida liu para no ema ida tun husi kareta hodi la’o ba fatin Oratóriu nian, ema ne ‘e mak Afonso Alves {ex presidente MJS no animadór} mai kumprimenta Irmán sira no Oratorianu sira. Irmán Armenia husu ba nia atu fó mensajen badak ba oratorianu sira. Afonso dehan: “ha’u agradese ba Madre sira ne’ebé mai hela iha ne’e no kontinua loke Oratóriu ba imi. Imi haksolok tanba hola parte ba família boot Maria Auxiliadora, D.Bosco no Madre Mazzarello nian. Ha’u mós mai husi oratóriu no sai boot iha Oratóriu, maski agora ha’u kaben ona maibe ha’u nafatin hadomi Oratóriu, hamutuk ho ha’u nia kaben ami lori ha’u nia oan ba Oratóriu”. Hafoin nia kontinua nia viajen ba Ainaro.

Oratorianu sira kontinua halo Karnavál ho dansa, drama no kanta ne’ebé simpátiku no kómiku. Molok fahe malu tuir tradisaun Saleziana Irmán no Animadores sira fahe rebusadu ba hotu.

Mensajen ba oratorianu sira: Ita sei hahú tempu Kuarezma ho loron Kuarta ‘Cinzas’, hamutuk hodi halo di’ak nafatin ba fatin hotu ne’ebé ita ba!

Ir.Teresa, FMA. Cassa