Komoro-Dili 26.02.2022, Grupo animadores Laudato Sí Dom Bosco Timor-Leste halao enkontru ba daruak nian iha salaun Eskola Maria Auxiliadora nian, hodi halo planu ba atividade Laudato Sí nian, prepara ba selebrasaun tinan Jubilario 150 Fundasaun Instituto Filhas de Maria Auxiliadora nian no preparasaun ba SCUOLA CIAO online no hatan ba plataforma ho Objetivo Hitu Laudato Sí nian ba foin sa’e no labarik sira. Animadores sira la mai kompletu maibe nain hira ne’ebé iha ba oin hodi halo programa lubuk ida. Ami hahu enkontru ne’e ho orasaun ne’ebé tau intensaun ba dame iha Ukraina ne’ebé lidera husi Me. Julia, FMA. Tuir mai Agapito hato’o imformasaun ituan kona ba sira nia enkontru online ne’ebé realiza ona iha tempo hirak liu ba, hafoin ami hare fali programa no atividade ne’ebé fulan kotuk ami hanoin hamutuk no kotinua kedas ho prepara orario.

Maun Agapito dehan: “Iha konferensia Online SCUOLA CIAO nian ne’ebé hau ho Bin Maria tuir iha tempo liu ba, ami hare ba objetivo principal sira mak hanesan: halo foin sa’e sira komprende konteudu husi Laudato Sí, Kuida ita nia uma komun liu husi: dimensaun Espiritual, estilo da vida no halo advokasia ho governu no organizasaun sira kona ba Laudato Sí no Gia foin sa’e sira hodi admira Maromak nia kriasaun.

Programa no atividade sira ne’ebé ami hare hamutuk iha fulan kotuk mak hanesan: Fo edukasaun ba labarik (estudante no oratoriano sira) sira kona ba natureza no direitu ne’ebé sira iha; Lori oratoriano sira hodi sai ba passeiu hodi kontempla Natruza nia furak no Maromak nia kriasaun; Konvida foinsae hotu atu servisu hamutuk; Promove Laudato Sí liu husi diskursu ka seminariu atu ema hotu bele hatene no forma konsiensia kona ba mentalidade ekolojia; Hanorin komunidade atu kuidadu natureza liu-liu sosilizasaun ba hirak ne’ebé tesi ai-horis; Kuda ai-oan/ aif-funan hodi uza kohe no laos plastiku metan: Oratorianos sira, Jovem sira, Grupo oioin; Hanorin oratoriano sira atu bele tau lixu iha fatin loos; Halo limpeza iha bairo/ oratorio semanalmente; Selebra loron-boot nasional no santo/a sira nian hodi kuda ai-oan; Halo asaun karitativa sira; Resiklajen ba lixu sira no haloo adubu organiku; Halo fatin tuur ho roda sira hodi ba rai iha oratorio sira iha Dili laran; Halo orasaun hamutuk ba Laudato Si; Tau-matan ba malu (apresia malu); Halo marsa iha dili laran hodi promove laudato si hodi koalia kona ba Global Warming no maneira prevensaun sira; Organiza diskursu ho relijiaun oi-oin kona ba Laudato Si; Konversaun Ekolojia; Follow up ba atividade sira hotu.

Programa hirak leten ne’e ba Planu tempo naruk dedikasaun ba tinan Ekolojia nian. Ohin ami hare hamutuk progama sira ne’ebé bele realiza iha tinan ida ne’e mak hanesan: Janeiro: hari’I grupo no enkontru dahuluk; Fevereiro: Planu annual ba Programa Laudato Sí; Marsu: Via Sacra Laudato Sí no kuda ai oan, Formasaun Laudato Sí ba Somnium Course no Krismante sira; Retiru ba Paskua nian no Konversaun Ekolojia; Abril: Formasaun Laudato Sí ba oratoriano sira no konkursu online video maker ba grupo hotu-hotu kona ba Laudato Sí; Maio: Seminario Laudato Sí, kompetisaun resiklajen no Marsa Laudato Sí husi Komoro ba Lecidere; Juniu: Avaliasaun no kontemplasaun Natureza; Juliu, Agostu, Setembru no ba oin tan: prepara drama Laudato Sí no atividade seluk tan.

Maluk sira, mundo ne’e iha ita nia liman rasik. Mudansa klimatika halo ita sente ona impaktu husi ita nia hahalok sira ne’ebé la kuida mundo ne’e rasik. Ita rasik sente terus tamba rai manas ne’ebé demais; udan tau ho volume ne’ebé a’as tebes hodi provoka inundasaun, rai halai no rai monu no seluk tan. Hein atu terus sira ne’e halo ita konsiente hodi tau matan ba ita nia mundo. Mai ita halo uluk asaun kiik sira hanesan la soe foer arbiru, labele uza plastiku, kuidadu hahan no han hotu, keta husik hahan resin iha bikan laran no soe deit tamba “ai-hanne’ebé ita soe hanesan naok tiha husi ema kiak nia meza”. (Laudato Sí, no.50). Nune’e atividade sira ne’ebé ami planu ona iha leten ne’e, ami hein mos ita bo’ot sira nia suporta atu hamutuk ita tau matan ba ita nia “Uma Komun”, eransa folin bo’ot ne’ebé ita sei husik ba ita nia oan no bei-oan sira. Mai hamutuk hodi halao atividade sira ne’ebé ami mensiona. Ita reza ba Nasaun ne’ebé funu dadaun “Ukraina” atu funu hotu lalais no ita reza mos ba ita nia rai atu moris iha dame laran. Obrigada barak.

(Noémia de Deus, FMA)