Ainaro loron 14 fulan fevereiro tinan 2022 sarani no estudante husi Munisipio Ainaro ho ksolok bo’ot simu Ilas São João Paulo II nu’udar mahein ba ministeiro edukasaun, husi Cassa irman sira akompaña estudante husi Escola publico Cassa ba partisipa iha Missa abertura ba ano letivo foun 2022 iha Munisipiu Ainaro no prezide husi Arcebispo Don Virgilio do Carmo da Silva SDB ho prezensa ministro edukasaun no autoridade local sira.

Iha Archebispo nia homilia dehan: “imi mak masin rai nian no naroman mundu nian” ida ne’e mak mensagen papa Saun João II nian iha Tasi tolu, ba fonsa’e Timor oan sira hotu iha loron 12 fulan Outubro tinan 1989 wainhira nia sama ain iha rai Timor , papa ida ne’e hadomi liu Timor oan sira, nia mate mos Timor nafatin iha nia fuan.

Estudante sira hotu ne’ebe ohin prezensa ne’e reprezentante husi escola oi-oin Municipiu Ainaro nian, tan ne’e Archebispo hato’o parabens ba sira tanba sira halo sakrifisiu, hodi mai partisipa missa abertura. Ministeiro edukasaun hili Papa São João Paulo II sai mahein ne’e tanba primero: papa ida ne’e mai ona Timor no ho ninia prezensa lori Timor ba Mundo, halo mundu hatene ita nia destino no moris. Segundo: Papa ida ne’e mos hadomi liu labarik no foinsa’e sira, nia dedika an ba foinsa’e sira hodi hamoris Jornada Mundial Juventude. Tuir Papa saun João Paulo II, Idade labarik no foinsa’e sira nian mak idade osan mean, tanba idade ne’e mak aprende, mehi atu sai saida no prepara an ba futuru, estudante ne’ebe diak hahu ho dixiplina ba tempu, se agora mak la hatoman an, aban bain rua sai professor/a tardi hela deit. Estudante ne’ebe diak aprende rona, rona professor/a, inan aman sira, mai missa rona Maromak nia liafuan no dazafiu ohin loron nian ba estudante sira mak media komunikasaun. Husi media komunikasaun ita bele hetan buat diak hotu no buat aat hotu.

Depois de missa hotu, Amu Arcebispo husik nia mensagen ba estudante sira: reza ba Papa saun João Paulo II atu tulun imi, sai foinsa’e ne’ebe diak hatene respeita maluk sira, hadok an husi violensia, la bele iha tan oho malu no la iha tan lia fuan hau nia saudara. Imi hotu mesak maun alin, mesak Timor oan, hadomi malu, atu bele hari rai Timor ne’ebe diak.

Ir. Teresa FMA – Cassa