Dili – Comissão Juventude Católica da Arquidiocese de Dili (COJUCAD), 13 Fevereiru 2022, partisipa iha Programa Formasaun Espiritual no Humano (hanesan mos ho Comissão Juventude Católica husi Diocese Baucau no Maliana) ne’ebé organiza husi Comissão Nacional Juventude Católica Timor Leste (CNJCTL).  Formasaun refere sei haklean Papa Francisco nia carta ba joven sira no ba Kreda tomak (“Christus vivit”), kada semana sei haklean kada Capítulo ho impenu konkretu.

Ba COJUCAD ohin dia 13 fevereiro, husi tuku 8.30 to’o oras 17.30, halo formasaun kona ba Christus Vivit Capitolo 1, ba foinsa’e sira hamutuk 46, iha Fatin COJUCAD, hodi halo dalan fiar no umano nian hamutuk ho figura foinsa’e sira ne’ebè Maromak nia Futar lia fuan koalia kona ba foinsa’e sira iha Capitolo I Christus Vivit nian.

Formadora ba Tema ida ne’e mak Me. Julia Marçal, FMA, ho kreatividade no dinamica tebes apresenta figura foinsa’e sira husi Antigo Testamento no Novo Testamento. Hahu ho Antigo Testamento: Madre tulun ami foinsa’e sira hodi ba komprende husi parte profeta foinsa’e sira ida idak nian ne’ebè moris iha situasaun ida konkreto, sira nia vokasaun no oinsa sira disponivel hodi hatan ba Maromak nia bolu ho sira nia potensialidade no frakezas umana. Iha parte segundo hare pontu de vista Maromak nian ne’ebè hola iniziativa hodi hakbesik An ba foinsa’e sira, liu husi mehi, anjo ka husi instrumento seluk hodi bolu foinsa’e sira ba misaun ida. Maromak apresia no fo importansia ba foinsa’e sira nia kbi’it, entusiamo no fiar, maske iha tempo ne’ebá ema la dun fo folin ba sira, Maromak komunika buat boot no presija sira nia kontribuisaun hanesan Jose Jacob nia oan; Gedeão, David, Salomão, feto nain rua ida Komadante Asiria Naaman nia atan feto ho Rute no Profeta  SAMUEL: maske nia sei labarik maibé Na’i ko’alia ba nia. Nia komprende Maromak nia bolu tamba nia hatene rona katuas Eli nia konsellu, nia loke nia fuan atu rona Maromak nia bolu. Konvida ami foinsa’e sira atu halo dalan discernimento vocacional nian hodi buka konfronta ami nia duvida,  mehi sira ho ema adulto ruma maibe liu – liu atu husik an atu Maromak nia Espiritu Santu bele  gia ami.

Hafoin, ho figura sira iha Novo Testamento: Joven riku, Oan ki’ik, Feto matenek nain liman no feto faluk ida nia oan mane nebe mate. Kuinese no konfrota ami nia vida ho sira, hodi hametin fiar no tulun ami komprende katak joven mak Igreja no igreja mak joven. Uluk knanain katak Jesus ida nebe Moris hias, ida nebe hakarak atu foinsa’e sira moris. Nia fo apoio ba foinsa’e sira atu pronto halo mudansa ba sira nia vida no aprende atu hametin relasaun intimo ho Nia, iha situasaun saida deit, tenki hatene katak Jesus iha hela sira nia sorin, husu atu ami foinsa’e  sira moris matan moris neon nain hodi hatene loke nia an ba futuro, hodi aprende buat ruma husi ema seluk nia esperiénsia.  Tamba iha realidade, tendensia atu sai hanesan joven riku ida nebe hakarak hetan moris rohan laek maibe depois de rona Jesus nia resposta ita mos bele fila kotuk no ba ho triste. Formasaun ida ne’e husu atu ami keta husik ami nia tempu juventude nian hodi moris ho modelo dukur, distrasaun, moris superficial deit. Maibe se karik moris hanesan “Oan ki’ik liu nebe hakarak husik ami nia uma hodi ba rai dook, hela iha nakukun laran karik, aprende husi Oan kiik buka foti desizaun hodi hamriik no fila fali ba dalan diak, tamba figura ida ne’e hatudu lolos ami foinsa’e sira nia natureza rasik ne’ebè prontu atu aprende husi moris, prontu atu halo mudansa depois de monu ka koko buat hotu nebe ami hakarak. Jesus hahi foinsa’e kiik maksalak ne’ebé brani fila ba dalan los ho fuan renovados.

Iha Capítulo I ida ne’e mos, Maromak konvida ami foinsa’e sira atu hatene respeita sira ne’ebé otas boot liu ami no tempo hanesan husu  sira atu  hatene tau matan ba ami foinsa’e sira hanesan alin, keta hanehan ami, atu ami bele mehi buat boot, buka orizonte nebe luan no buka buat nebe aas liu ba ami. Tan ne’e husu ami foinsa’e  sira atu keta husik ema na’ok  ami nia esperansa, keta sai foinsa’e superficial, isolado, no husik kultura mate nian ukun ami nia sentimento sira, lakon entusisamo no optimismo. Maibe hateke ba Jesus tan nia konvida, hanesan uluk nia dehan ba feto faluk nia oan nebe mate: “Foinsa’e hau dehan ba o hamriik ba”!.

Depois de han Meudia, ami fahe ba grupo kiik hodi fahe ami nai reflesaun no halo serbisu grupo nian hodi apresenta ami nia resposta ba perguntas sira ho modo kreativu liu husi drama no kanta, molok ida-idak foti impenu konkretu atu tau iha pratika.

Formação Espiritual no Humana ida ne’e, centro mak CRISTO, ikus remata ho santa Misa domingo nian ne’ebé celebra husi Pe. Mariano Maia.

Obrigada barak ba oportunidade ne’ebè ami hetan hodi foti ho seria tempu juventude nian, moris ho ksolok, esperansa no ho rahun diak hodi halo prosesu atu hasai hatais tuan ba hatais foun Kristu nian, atu ami nia moris juventude atinji nafatin ba we matan Kristu nia Futar liafuan no Futar Isin. Nune’e moris komunaun ho Nia, iha nia Kreda no sai joven apostulo ba joven. Viva Christo Vivit.

 

(fasilitadora Evan Araujo)