Maliana – Iha loron 12 Fevereiru 2022, foin-sa’e  hamutuk na’in 20 tuir formasaun ne’ebé realiza husi komisaun Nasionál  Juventude Katólika Timor-Leste hodi haklean dokumentu Papa Francisco, Christus  Vivit.

Ir.Virgilia Marcal FMA, aprezenta  ba foin-sa’e Dioseze Maliana,  kapítulu dahuluk  husi dokumentu refere, ne’ebe koalia kona ba figura foin-sa’e sira iha Biblia testamentu Tuan no testamentu foun. Maromak uza foin-sa’e sira atu kolabora ba misaun salvasaun nian iha rai, fanun fali foin-sa’e ohin nian atu hadeer katak Kreda presiza sira no Kreda hein sira atu serbisu ba Nai nia povu. Nune’e ho prezensa  foin-sa’e nian, Kreda bele buras nafatin tuir Kristu nia ain-fatin tan Kristu rasik mak Foin-sa’e ida no Nia dehan  “foin-sa’e ha’u dehan ba ó hamriik bá no keta husik ema sama imi nia esperansa”.

Formasaun ida-ne’e Foin-sa’e sira partisipa ho ativa no entuziasmu  hodi hatán ba perguntas sira, reflete no sharing hamutuk ideia konaba oinsá nudar foin-sa’e bele forma-an intergralmente nune’e bele moris slogan ‘’kreda mak foin-sa’e no foin-sa’e mak kreda’’ . Atividade ne’e remata ho Eukaristia Santa.

(FMA Cailaco)