Dili – Komunidade FMA ne’ebé hamahan an iha Beata Eusebia Palomino nia protesaun no Grupu Foin-sa’e Voluntáriu Palomino, selebra hamutuk ninia festa, iha loron 9 Fevereiru 2022. Foin-sa’e Grupu Palomino mak grupu ne’ebé harii tinan kotuk (2021) bainhira mosu inundasaun iha Dili no sira mak foin-sa’e sira ne’ebé halo voluntariadu atu tulun FMA sira to’o ba ema deslokadu sira hela iha eskola Maria Auxiliadora no bá to’o iha fatin sira ne’ebé afetadu hanesan Maslidun, Beduku nst.

Foin-sa’e sira hamutuk na’in tolunulu, mak anima liturjia ho knananuk hodi fó kór oinseluk ba festa tinan ne’e nian. Festa hahú ho selebrasun eukarístika, prezide husi Pe. Jojo  SDB. Nia dehan katak, nia halo peskiza uitoan kona-ba Beata Eusebia nia moris liuhusi internet atu bele koñese Beata  Eusebia. Padre koa’lia uitoan kona-ba nia moris husi família kiak no husi fatin ne’ebé kiak, no ida-ne’e halo nia hatene hadomi virtude pobreza no depende tomak ba Maromak. Bainhira nia papá labele ona serbisu tanba aleija nia liman, nia hamutuk ho nia papá bá husu esmola iha knua sira.  Husi ninia papá mak nia aprende koñese Maromak no hadomi nia, liuhusi katesizmu. Eusebia mós hadomi liu natureza no hodi la’o iha kampu sira nia hasoru Maromak hodi hahí Na’i. Nia la estuda barak, to’o de’it primeira klase, maibé nia aprende sabedouria Maromak nian liuhusi ninia simplisidade no konfiansa ba Maromak no Na’i-Feto. Nia hetan konvite husi feto-raan ida atu tuir oratóriu, no bainhira hasoru FMA sira, sira konvida nia atu sai “volontária” hodi serbisu iha sira-nia komunidade no koléjiu.

Ita lee katak, Eusebia hakarak tebes tuir Maromak iha vida konsagrada, maibé tan ninia pobreza no ninia ignoránsia, nia la barani husu. Maibé, Na’i-Feto hakarak nia ba nia oan. No bainhira superiora husi Itália ba vizita España, dalan nakloke ba nia atu konsagra an tomak ba Maromak nu’udar FMA.

Iha ninia moris FMA nian, nia hala’o serbisu ki’ik, umilde no simples iha dapur, iha to’os, iha portaun no asiste labarik sira ne’ebé kiak no ladún matenek iha oratóriu. Maibé, labarik feto barak halai ba nia, tanba sira hetan iha nia ema ida nakonu ho Maromak no dada sira ba Maromak. Nia mak katekista ida ne’ebé ko’alia ba labarik no feto-raan sira husi ninia esperiénsia rasik enkontru kle’an ho Maromak, kuda iha siradevosaun ba Jezús no nia Kanek Lima sira no ba Maria.

Ir Eusebia mak fatuk-murak ida santidade nian haksumik iha moris baibain. Fatuk-murak ne’e, ninia diretora Ir Carmen Moreno mak deskobre. Nia moris nia tutun remata ho saran an ba España nia konversaun, iha tempu ne’ebé komunista sira persege Kreda Katólika.

Depoizde Santa Missa, Padre, Irmán no foin-sa’e sira jantár hamutuk no kontinua ho kumprimenta malu liuhusi animasaun aprezentasaun husi parte foin-sa’e sira-nian no husi Irmán FMA sira.

(Sidonia Freitas-JG)