Inísiu prosesu: 12 – 04 – 1982
Venerável: 17 – 12 – 1996
Beatifikasaun: 25 -04- 2004

Eusébia Palomino Yenes moris iha Cantalpino, provínsia Salamanca nian (España), iha 15 Dezembru 1899. Agostinho Palomino, mane fiar auténtika ida, nia família kiak liu. Iha períodu ruma tinan nian Eusébia no nia aman tenke husu esmola iha sidade viziña sira, maibé sira halo ho ksolok no fiar ne’ebé la’ós baibain nian.

Iha viajen naruk sira ne’e, Agostinho hanorin katesizmu ba nia oan-feto, ne’ebé hamrook atu aprende Na’i nia mistériu sira. Iha Eusébia nia família, serbisu, harohan no hadomi malu. Loron Primeira Komuñaun nian Eusébia moris ho intensidade. Depoizde loron ne’e kedas, nia ba serbisu ba família rika ida. Nia la monu ba tentasaun adolexénsia nian, hodi tau nafatin iha fatin dahuluk nia belun Jezús. Sira haruka nia ba Salamanca, uluknanai nu’udar “babysitter” hafoin nu’udar asistente iha ospitál ida. Nia hakarak liu sai relijioza.

Loron ida, serbisu hela ho enxada, nia hetan medalla Maria Auxiliadora nian. La kleur, belun feto misterioza ida lori nia ba oratóriu Irmán sira-nian, ne’ebé konvida nia atu hela ho sira, nu’udar empregada. Ho modu estrañu, dapur sai edukanda sira-nia fatin atu hasoru makte’in/koziñeira ignorante ne’ebé iha nafatin liafuan di’ak ba sira. Iha Salamanca mak Madre Vigária aseita nia iha postulante sira leet.

Eusébia halo novisiadu iha Barcelona, hodi fó ezemplu di’ak ba nia maluk sira ho ninia haraik-an no ninia hamnasa-midar. Nia sai Filha de Maria Auxiliadora iha 1924, hetan obediénsia iha Valverde del Camino ho enkargu koziñeira nian no ajudante doméstika. Nia hahú hala’o nia serbisu ordináriu ho modu di’ak estraordinariamente. Hanesan Don Bosco hakarak, no Na’i hakonu nia ho ninia don sira.

Iha ne’ebá mós foin-sa’e feto sira hakbesik ba nia, tanba sente atrasaun ba ninia faxíniu espirituál. Nia hahú serbisu iha oratóriu. Seminarista sira, adultu sira no padre sira husu konsellu ba nia, tan haree ninia espíritu orasaun no fiar konvikta no konvinsente. Nia habelar devosaun ba Na’i nia Kanek Santa sira no ba “eskravidaun mariana”  S.Luís Maria Grignon de Montfort nian. Ema haktuir faktu espesiál sira ne’ebé akontese iha ninia moris. Hanesan Don Bosco, nia simu husi Na’i don profesia nian. Nia halo profesia kona-ba funu sivíl española no oferese nia an nu’udar vítima ba España. Nune’e nia hahú moras. Ninia diretora, Ir. Carmen Moreno, depois sai mártir no beata, tau matan ba nia, enkuantu halibur ninia pensamentu sira. Ir. Eusébia profetiza ninia martíriu.

Molok mate, Ir. Eusébia iha momentu sira éstaze no vizaun nian. Nia aprezenta an ba Na’i iha 10 Fevereiru 1935. S. João Paulo II beatifika nia iha 25 Abríl 2004. Ninia restu mortál sira hela hakmatek iha Valverde.