Devosaun ba Kristu nia futar Kanek Lima mak devosaun kristolójika, mai husi Krús Santa, iha ne’ebé tan domin ba umanidade Kristu saran Nia moris hodi mate iha krús atu kasu ita salan. Hahalok adorasaun dahuluk ba Kanek Santa Lima Maria Santísima mak halo, bainhira ema hatún Jezús husi krús. Husi S. Tomé to’o ita-nia tempu, iha devotu barak no habelar-na’in sira kona-ba devosaun ne’e, liuliu hahú ho S. Bernardo no moris iha tradisaun igreja nian.

Devosaun ne’e mak espresaun ida ita-nia domin adorasaun nian ba divindade-umanidade Na’i nian. Nia mak loos duni Maromak no ema. Nia terus no mate tebes duni iha krús no moris hi’as. Ninia kanek sai hanoin-memória sensivel ida kona-ba akontesimentu sentrál ita-nia Fiar nian, ne’ebé to’o ba ema hotu, mane no feto ida-idak ho nia forsa salvasaun nian. Rekizitu ida de’it mak loke odamatan ba Na’i ne’ebé dere.

Kristu nia kanek sira mak kanek ne’ebé Nia simu iha krús hodi hatudu mós ba apóstolu sira depoizde moris hi’as husi mate. Kristu nia kanek sira sai fonte grasa nian ne’ebé laiha rohan, sai fonte Mizerikórdia nian, esperansa no domin nian, ne’ebé habosu santidade klamar sira kontemplativa, misionária no apostólika. Kristu ni a kanek sira sai koroa glória nian ba mártir sira no vitória nian iha tempu hotu. Kanek sira ne’ebé sai fonte purifikasaun nian iha batizmu, fó moris ba ita iha Eukaristia no fó fekundidade ba Santa Igreja tomak.

Iha mós santu no klamar virtuozu sira simu estigma/kanek hanesan Kristu nian mak S.Francisco Assis, Santa Rita de Cassia no padre S. Pio di Pietrelcina.

Beata Eusebia Palomino mós iha devosaun boot no habelar devosaun ba Jezús nia Paixaun no nia Kanek Lima.

Nu’udar modu maravillozu Kristu kondekora sira ne’ebé hadomi Nia ho laran-manas iha mundu ne’e. Nune’e mós atu Ninia domin ne’ebé invizivél sai vizivél ba sira ne’ebé Nia hili, atu halo memória ne’e sai perpétua iha ema rahun-di’ak sira, ne’ebé fiar maske la haree, atu bele kona Jezús nia kanek hanesan S.Tomé.