Dili, 2 Fevereiru, loron ne’e sai loron espesiál ba Relijiozu/a sira tanba loron ne’e monu loos iha Festa Aprezentasaun Nai nian. Selebrasaun ba loron ne’e hala’o iha Katedrál Dili iha oras tuku 17.00 Lokraik, hahú ho bensa lilin iha Igreja Katedrál oin, ne’ebé selebra husi Amu Arsebispu Dioseze Dili, Don Virgílio do do Carmo da Silva, Sdb . Selebrasaun ne’e envolve Relijiozu/a sira ne’ebé hola parte ba Dioseze Dili nian atu hametin liután fraternidade no unidade hodi hala’o servisu iha Kreda ho ita hotu nia prezensa.

Amu Virgílio iha ninia omilia, subliña atitude agradesimentu: “Ita nafatin agradese ba Maromak tanba ita bele selebra hamutuk filafali iha fatin ida ne’e ba buat di’ak hotu ne’ebé ita simu iha tinan ne’e nia laran. Ita konsente katak loron ne’e ita selebra Festa Aprezentasaun Jezús nian iha templu. Mai ita sai mós Maromak nia mensajeiru iha tempu ohin nian. Maromak haree ema nia fidelidade maibé oinsá ho ita nia resposta? Ema loos hein hodi haree Israel nia Ksolok, ne’ebé hatudu liu husi Profeta Simeaun  ho Ana nia ksolok hodi hein kosok Oan iha tempu, ho pasiénsia hein o harohan nafatin. Konvida mós ita-nia an atu hein Na’i iha moris loro-loron nian  ho maluk sira baibain, liu husi ita nia jeitu simples sira. Husi ne’e mak Maromak hakarak hatudu an ba ita ema”.

Iha ikus nian Amu Arsebispu konvida Sarani sira hotu atu reza iha Fulan Fevereiru nia laran ba konsagradu/a no ba sira ne’ebé hakarak hili moris relijiozu/a.

Hotu tiha Missa, iha konfraternizasaun ba Konsagradu/a sira nia Superiór/a no reprezentante sira ne’ebé simu konvite.

(Ines Bartolo FMA)