Baucau – Ho festa Aprezentasaun Na’i nian nu’udar festa Konsagrada sira nian iha loron 2-2-2022, Dioseze Baucau halibur relijiozu/a sira hahú husi loron 1-2-2022 hodi halo kongresu kona-ba vida konsagrada iha Igreja Sinodál iha parokia St. António Baucau. Pregadór mak padre Gabriel SVD no senhor Evaristo de Jesus. Nune’e pe. Gabriel haktuir kona-ba Igreja no konsagrada sira nia moris no misaun. Igreja mak Maromak nia povu iha komuñaun fraterna no preokupa ho natureza tomak.

Konsagrada sira iha sinodalidade presiza buat 3 ne’ebé importante: komuñaun, partisipasaun no misaun, nu’udar kontribuisaun ba Kreda. Tan misaun mak hahoris Igreja nune’e ita nia partisipasaun ho forma oioin hodi hala’o misaun ho espiíitu diálogo nian. No senhor Evaristo haktuir kona-ba sarani sira nia papél iha kreda katak sarani sira fiar seidauk metin, balun sai sarani elektróniku de’it, ekonomia, ‘status’ nst…no konsagrada sira nia papél iha Igreja nu’udar ezemplu no modelu ba sarani sira nia moris. Tanba Igreja mak família ne’ebé KRISTU rasik mak halibur.

Iha loron 2-2-2022, kontinua ho misa Solene ne’ebé prezide husi Administradór pe. Alipe iha nia omilia dehan: sinál uma Kreda nia moris mak mai husi vokasaun Vida Konsagra nia moris, nune’e konsagradu sira nia misaun mak atu harii komuñaun, tanba ho komuñaun de’it mak ita bele lori misaun.

Depoizde misa kontinua ho espozisaun no promosaun Vokasionál kongregasaun ida-idak nian, ne’ebé partisipa husi estudante sira eskola sekundária Munísipiu Baucau nian no remata ho kongregasaun ida-idak hatudu sira nia Karizma liu husi knananuk no dansa sira hodi kumprimenta malu.

Ho atividade hirak ne’e, bele tulun foinsa’e sira atu deskobre sira nia vokasaun no hatene hili ho liberdade no hakarak rasik, maski iha mundu ne’ebé dada maka’as foin-sa’e sira, maibé la halakon konsagrada sira nia saran-an ba Maromak ho totalidade hodi moris iha komuñaun tan DOMIN BA KRISTU.

(Onesiana – Lourdes FMA)