Cassa (Ainaro) – Loron 31 Janeiru 2022 mak loron boot no espesiál ba Kongragasaun FMA iha Timor tanba marka tan istória foun. Iha Solenidade Festa São João Bosco nian no tinan 400 São Francisco de Sales nia mate nian Ispetoria TIN ofisialmente loke Komunidade ida iha Cassa, Komunidade Madre Rosseta Marchese. Presente bo’ot ba kongregasaun no haluan liu tan Misaun Salesiana iha Rai Timor. Iha okaziaun ne’e marka mos prezensa Sra. Rossela Boccassini atu hare Madre Salesiana sira nia Misaun liu-liu iha fatin foun ne’ebé hahu dadaun.

Padre Paroko Ainaro, Pe. Armindo Brito, Pr. Espressa nia ksolok no gratidaun tanba prezensa FMA nian iha Estasaun Misionária Cassa. Padre dehan: “ Ohin loron espesial ida ba ita sarani sira iha Estasaun Misionária Cassa tanba ohin ita selebra Solenemente Festa São João Bosco nian ho alunos sira ne’ebé maioria joven no labarik sira, hamutuk ho inan-aman sira, ho Madre sira mai iha Misa ida ne’e. Laos deit selebra festa solenemente, maibé ohin ofisialmente Madre sira nia komunidade hamrik ona iha ita nia le’et. Ohin iha introdusaun hau rona Madre sira nia komunidade hamrik ona iha Cassa hau sente hanesan rai nakdoko, tanba hau sente orguluho tebes, hau hanoin fila fali parese espíritu São João Bosco nian mak tama iha hau nia laran, hau nia fuan nakdoko tanba saida,  maibé tansa hau buka Madre Salesiana sira, iha Ainaro iha Madre Canosiana sira, iha Jumalai no Suai iha Madre SSPs, iha Carmelita, iha Franciscana no sira seluk  maibé tansa hau husu tan Madre Salesiana sira, tanba karisma Salesiana. Hau hakarak joven sira no labarik sira iha Cassa ne’e moris haksolok iha moris lor-loron. Madre sira nia misaun lolos mak ba joven no labarik sira. hau ladun koñese São João Bosco, hau le’e no haklean ituan kona São João Brito nia moris ne’ebé hanesan ituan ho São João Batista. São João Bosco servi ema laos ho osan m aibe servi ema ho fuan, ho domin. Espirito ne’e mak halo São João Bosco wainhira tama iha joven no labarik sira nia le’et halo nia haluha-an tiha. Halo nia-an hanesan joven sira atu manan sira. Nia halo sulap, milagre oi-oin no mos lao iha tali leten tanba hakarak fó ksolok  ba joven no labarik sira ne’ebé hetan susar oi-oin. Nia nia-an tomak atu servi foin-sa’e no labarik sira. Nia halo buat barak, se imi hakarak hatene husu Madre sira lori nia livro mai tau iha igreja ka madre sira nia uma ka iha eskola atu imi le’e hodi hatene kona ba São João Bosco nia moris. Iha Cassa hahu husi ohin ba oin ita amenta tan loron festa ida. La’ós de’it Solenidade Nossa Senhora nian no São José nian de’it maibé São João Bosco nian mos. Nune’e tinan-tinan ita mos sei selebra Solenidade S. João Bosco nian. sira agora iha ita le’et, ita mos tenke simu sira. Ne’e duni loron bo’ot iha Cassa tolu ona; 13 Maio, 19 Marsu no 31 Janeiro.keta haluha, se iha 31 de Janeiro imi husik hela Madre sira mesak-mesak signifika katak imi nia laran seidauk metin ba malu. Sá tan Madre sira fó ona sira nia domin mai ita kuaze tinan tolu nia laran, tanba sira hatene katak ita hadomi sira no sira mos hadomi imi tan ne’e mak ho lisensa Madre bo’ot sira ninian sira loke Komunidade ida ne’e. Ba oin sei mosu buat diak barak. Buat diak sira ne’e hahu husi kiik-oan sira no joven sira. Iha Cassa iha joven no ki’ik sira ne’e agora iha eskola, tan ne’e mak Madre sira nia servisu hahu iha eskola. Agora mos hahu sira mai tuir Misa iha Domingu, Tersa no Kinta loraik, sira mos lori ona ho inan-aman sira mai iha igreja. Ne’e mak grasa S. João Bosco nian. ba oin sei halo barak liu tan iha ita le’et. Hanesan iha Primeira Leitura dehan iha Livru Bém Sirá: ‘Matenek hotu mai husi Na’i Maromak, iha nanis kedas ho Na’i Maromak. Tinan ba tinan nia iha nanis ona. ha’u oan, ó ne’ebé hakarak fó ó an tomak ba matenek ne’e, ha’u sei kria ukun fuan sira no Na’i Maromak sei haraik matenek ne’e ba o’. Hanesan S. João Bosco tanba nia hadomi tebes Maromak, hatudu nia ulun mamar, fó nia an tomak halo tuir Maromak nia ukun fuan, Maromak halo nia sai Santo, sai aman diak ba ema hotu-hotu. Maromak bolu ita hanesan Maromak nia oan, ita halo tuir S. João Bosco moris tuir Maromak nia ukun fuan. Ukun fuan iha barak maibé ita halo liu-liu mak rua ne’e ‘hadomi Maromak no hadomi maluk sira’. S João Bosco hadomi Maromak no maluk sira mak halo nia sai modelu ne’ebé diak no halo ema barak inklui Madre Salesiana sira hamahan an iha nia. Ita sai S. João Bosco nia oan espirituál tanba hare ba nia moris espirituál ne’ebé besik ba Maromak no ba maun-alin sira. ita mos aprende husi S. João Bosco nia espiritualidade atu hadomi Maromak no mos hadomi maun-alin sira. hadomi mak moris hamutuk iha haksolok nia laran. Nia mak modelu ba ema sira ne’ebé kontente iha moris tanba hatene Maromak hadomi nia. Maromak fó  ba nia kbiit atu muda ema nia moris husi tristeza, husi todan, husi matan be’en ba ksolok. Hau gosta akompaña Salesiano sira nia atividade MJS ne’ebé hare joven sira haksolok. Ida ne’e sei to’o ba imi. Imi promete atu tuir nafatin Santu ne’e. S. João Bosco ne’e mane, tan ne’e husu ba mane sira atu mai tuir atividade sira. ami husu atu hato’o ami nia agradesimento bo’ot ba Madre Jeral ne’ebé autoriza ona Madre sira mai loke komunidade iha Cassa. Hato’o mos ami nia boas Festa ba Madre sira iha Timor laran tomak no Indonesia, ami agradese bo’ot tebtebes ba imi tanba imi bele sura mos ami iha imi nia fuan. Loron ba loron ita bele reza ba malu no tulun malu atu S. João Bosco nia Espirito ne’e bele marka iha ita nia le’et no bele fanu ita hotu atu besik liu tan ba nia. Ita husu atu nia tulun ita hotu iha susar laran.

Me. Alma nia liafuan ruma: “uluk nanain hau hakarak agradese imi ba imi nia prezensa iha ne’e no imi nia partisipasaun. Mai ami festa Dom Bosco nian, hanesan Padre dehan mak buat ruma importante liu. Hau hanoin ba imi ida-idak tenke sente DB hanesan belun ida. wainhira nia sei moris labarik sira dehan wainhira DB hateke ba sira hatene le’e sira nia klamar ka buat ne’ebé iha sira nia laran. Imi sente buat ne’e, hamutuk ho Jesus, DB belun ida ne’ebé bele akompaña imi, tulun imi atu komprende saida mak Maromak hakarak husi imi nia moris. Ohin ita haksolok hamutuk, hau agradese ba imi liu-liu iha Madre sira nian naran. Liu-liu iha tempo hirak ne’e imi sira ho diak no sira sente imi nu’udar sira nia familia. Tan ne’e ami deside atu hahu duni iha ne’e, tanba iha ne’e sira sente duni uma maski laos sira nia uma. Hamutuk ho DB agredese imi ba buat  hotu ne’ebé imi halo to’o agora. Ami promote reza ba imi ida-idak no imi nia familia. Ocida ami mos sei fó buat ruma midar ituan ba labarik sira.

(Noemia de Deus FMA)