Baucau – Ohin, ami haksolok tebes ho Madre Alma nia vizita badak iha ami nia komunidade Santa Teresa D’Avila Baucau, hodi halo konferénsia atu selebra tinan 150 ba ezisténsia Institutu FMA/SALESIANA iha mundu tomak, ho tema “MEMÓRIA NU’UDAR FINI FUTURU NIAN”.

Maibé Madre hahú ho pergunta ne’ebé sadik ami nia hanoin katak: tansá ita selebra no oinsá? Pergunta ne’ebé furak atu Irmán ida-idak hatá. Ne’e mak momentu ne’ebé ita agradese Maromak no presiza filafali ba ita-nia orijen ho kriatividade, tan fini vokasaun ne’ebe Don Bosco no Madre Mazzzrello kari hela iha Mornese, no ho Maromak nia grasa ohin loron fini ne’e namkari no buras iha mundu tomak ho espíritu Mornese nian.

Nune’e hodi hateke ba komunidade dahuluk nian, ne’ebé rona ho ezijénsia uluk nian, interpela mós ami oinsá atu rona situasaun ohin loron, hodi halo dixernimentu no uza ita-nia kategoria Saleziana nian ho estilu edukativu preventivu hodi fiél ba ahi-oan orijen nian no ita-nia liman rohan Sistema Preventivu.

(Onesiana no Lourdes)