Cailaco – Komunidade Beata Maria Meneses Romero, selebra festa Beata Laura Vicuña ho selebrasaun Eukaristia Santa ne’ebé prezide husi Pe. Agapito, SDB.

Iha ninia omilia, Pe. Agapito dehan:“Laura mak modelu laran moos nian ba foin-sa’e feto sira. Laura nia domin la sukat ho nia moris rasik, la mehi ba buat barak ne’ebé mundu bele fó, maibé mehi ida deit mak folin boot liu ba nia: manán nia inan nia klamar ba lalehan. Hanesan Reitór-Mor nia strenna ho títulu dehan “halo buat hotu ho domin la’ós ho forsa” . Laura hatudu konkretu iha nia moris rasik. Tanba domin ba Jezus no nia inan rasik oferese nia an nu’udar sakrifísiu ida ba Maromak. Nune’e “bolu mós foin-sa’e sira hotu atu la’o tuir nia dalan maski agora susar tebes maibé fiar katak se imi hadomi Jezús imi bele salva ema seluk nia moris.” Tenik Pe. Agapito SDB.

Iha mós atividade seluk ne’ebé hala’o hamutuk ho labarik no foin-sa’e sira haree filme, prepara Jornál Parede no mós kuda ai-oan, iha foho leten área uma foun ne’ebé harii daudaun. Labarik sira ho entuziasmu no la sente koleh, tanba domin ba sira nia belun boot Beata Laura Vicuña.