Komemorasaun litúrjika  21 Janeiru

Santa Inés, naran ne’e mai husi lian gregu signifika moos/pura. Inés moris iha Roma iha tinan 291. Mai husi família nobre, dexendente família Claudia. Sei ki’ik kedas eduka nia ba fiar Kristaun no nia iha ema ne’ebé tau-matan ba nia. Sei labarik hela hatudu ona personalidade forte no deside atu saran nia virjindade ba Maromak.

Ho tinan 13 ema barak mak husu nia atu kaben ho nia tan ninia bonita. Tan ninia riku no ninia bonita, foin-sa’e romanu ida naran Fúlvio, Simpronio Prefeitu Roma nia oan mane hakarak tebes Inés. Nune’e Fúlvio halo pedidu formál kazamentu nian ba família. Maibé Inés la simu tan ninia konsagrasaun ba Maromak. Ho hirus Fúlvio ameasa Inés nu’udar kristán. Tan iha momentu ne’ebá persegisaun hasoru sarani sira.

Tan ne’e, kaer Inés ho julgamentu falsu, kondena no fó kastigu oioin. Inés nia inan aman la bele halo buat ida tan Prefeitu Roma nian boot liu sira hotu.

Sira obriga Inés atu tau-matan ba ahi maromak-feto/deuza romana nian nune’e lakan nafatin, no mós ba ahi matan ne’ebé hanaran Vesta, iha templu ne’ebé dedika ba maromak-feto ne’e. Kastigu ida-ne’e nu’udar maneira obriga Inés atu nega ninia fiar.

Maibé Inés la simu no dehan ba Prefeitu: se ha’u la simu ó-nia oan ne’ebé mane, oinsa bele hanoin katak ha’u aseita atu fó onra ba estátua ida? Ha’u-nia espozu la’ós iha rai ne’e ( Jezús Kristu). Ha’u foin-sa’e ne’e loos, maibé fiar la tetu ho tinan maibé ho hahalok. Maromak tetu klamar, la’ós ho idade. Maski deuza sira hirus, ha’u la tauk. Ha’u-nia Maromak mak domin.

Prefeitu sai hirus liu, kondena Inés sai piór liután: halo nia molik iha uma prostituta nian iha sirku Agnolo iha Roma atu mane hotu bele hare. Inés husu Na’i nia protesaun. Nune’e roman ida husi lalehan mai taka tiha Inés, laiha ema ida bele hakbesik nia. Tuir mai ninia fuuk sai naruk hodi taka nia isin lolon tomak.

Prefeitu haree akontesimentu hirak ne’e, nia haruka soe Inés iha ahi lakan nia laran, maski nune’e ahi la halo buat ida ba Inés nia isin. Tuirmai nia haruka ema tesi Inés nia ulun. Nune’e ho tinan 13 nia mate. Iha loron 21 Janeiru tinan 304. Ho data ninia mate nian, festa santa Inés selebra iha 21 Janeiru, selebra ninia loron moris nian iha lalehan. Ninia isin rai hela iha igreja ne’ebé dedika ba nia igreja santa Inés iha Agone. Santa Inés mak padroeira ba pureza no kastidade nian.