Dili – Husi 18 to’o 25 Janeiru akontese Semana Orasaun ba Unidade Kristaun sira-nian, inisativa ekuménika iha-ne’ebé sarani sira mundu tomak nian, pertense ba tradisaun no konfisaun oioin, halibur malu espiritualmente iha orasaun ba Kreda nia unidade. Eventu ne’e ho modu ofisiál episkopál reverendu Paul Wattson iha Graymoor (New York) mak hahú iha 1908 nu’udar Oitaváriu ba Kreda nia unidade, ho augúriu atu sai prátika komún, realiza tinan tomak entre Festa ‘Cátedra de São Pedro’ no konversaun S. Paulo nian.

“Pontifício Conselho para a Promoção da Unidade dos Cristãos” konfia ba “Conselho das Igrejas do Oriente Médio”, ho sede iha Beirut, Líbano, knaar atu hili tema no hakerek testu sira ba Semana Orasaun 2022 nian. Tema ne’ebé hili mak:

“Ami haree nia fitun mosu iha Loro-sa’e no ami mai iha-ne’e atu adora Nia” (Mt 2, 2).

Fitun mosu iha Loro-Sa’e, ne’ebé gia Magu sira ba deskoberta Na’i Jezús nian, símbolu manifestasaun nian, mak “rikusoin ne’ebé kristaun sira Oriente Médiu nian oferese ba ninia maun no biin-alin sira iha mundu tomak”.

Iha introdusaun teolójiku-pastorál subsídiu nian ita lee:

“Divizaun sira entre ita hamate naroman sasin kristaun sira-nian no halo dalan sai nakukun, hodi impede atu ema seluk hetan dalan ne’ebé lori ba Kristu. Iha kontráriu, kristaun sira hamutuk ne’ebé adora Kristu no loke sira-nia ai-balu iha troka prezente sira-nian, sai sinál unidade ne’ebé Maromak hakarak ba kriasaun tomak”. 

«Nunka iha tempu difisil sira hanesan ohin, ita sente nesesidade ba naroman ida atu manán nakukun sira, no naroman ne’e, hanesan kristaun sira haklaken, manifesta iha Jezús Kristu»,  ‘Pontifício Conselho’ subliña iha introdusaun, hodi ilustra kontestu ne’ebé prepara tema Semana nian:

“Kristaun sira Oriente Médiu nian oferese materiál ne’e ba Semana Orasaun ba Unidade, konxiente katak mundu kompartilla ninia laran-susar no difikuldade barak ne’ebé sira esperimenta no hamrook ba naroman ida ne’ebé bele halakon nakukun sira iha dalan ba Salvadór. (…) Ami agradese ho fuan tomak ba membru sira Grupu Lokál nian no ami harohan atu unidade boot liután entre kristaun sira iha Oriente Médiu no iha mundu bele kontribui ba moris ida dignu liután, justu no dame nian ba mane no feto hotu ita-nia tempu nian no ba tempu sira ne’ebé sei mai”.

Papa Francisco, iha Angelus 16 Janeiru 2022, fó hanoin kona-ba inisiativa, hodi konvida ba orasaun no oferta terus sira-nian ba intensaun ne’e:

“Ita kristaun sira mós, iha diversidade ita-nia konfisaun sira no tradisaun nian, mak peregrinu sira iha dalan ba unidade nakonu, no ita hakbesik ba meta bainhira ita fihir metin Jezús, Na’i ida mesak. Durante Semana Orasaun, ita oferse mós ita-nia susar no terus sira ba kristaun sira nia unidade”. 

Iha konkluzaun Semana Orasaun ba Unidade Kristaun sira-nian, iha 25 Janeiru 2022, iha Roma, iha Bazílika S. Paolo Fuori le Mure, Santu Padre sei prezide selebrasaun Vésperas II iha solenidade Konversaun S. Paulo Apóstolu nian.

Link:

Pontifício Conselho para a Promoção da Unidade dos Cristãos

Escritório Nacional CEI do Ecumenismo e Diálogo Inter-religioso