Dili – Ohin 16 Janeiru 2022 Komunidade B. Eusebia Palomino Comoro, Dili halo abertura Oratóriu Ceferino Namuncurá (Sentru B no Sentru E). Ami nia atividade ne’ebé hala’o mak hanesan, kada sentru organiza oratorianu sira halibur hamutuk iha Sentru E mak.

Ne’e ba dala uluk oratorianu Sentru E hamutuk ho Irmán no animadór/a sira fó Benvinda ba oratorianu Sentru B. Tuir mai animasaun jerál hamutuk mak dansa no kanta depois kontinua kedas ho jogos: tebe bola, la’o ho berlindes, dansa sama balaun, no jogos unidade mak hanesan pasa balaun kada grupu mantein ninia membru.

Remata jogos kontinua fali esplika estréia Reitór-Mor ba 2022. Fulan Janeiru mak fulan Salezianu. Ita Família Saleziana iha tinan ida atu hanoin no selebra Saun Francisco de Sales nia tinan atus haat mate nian. Estréia ita nia Reitór-Mor ba tinan 2022 konvida ita tomak hateke ba S. Francisco de Sales, “Santu Padroeriu Família Saleziana, nu’udar sasin Domin nian. “Estréia ho Títulu “FAZEI TUDO POR AMOR, NADA POR FORÇA”. Ita husu ba Na’i, autor Domin nian, liu husi intersesaun S. Francisco de Sales no S. João Bosco, atu ita kontinua luta no luta atu sai Sinál no maklorik Domin Maromak nian ba labarik, foin-sa’e no maun-alin sira ne’ebé ita hasoru.

Iha loron ne’ebé hanesan oratorianu sira halo ‘pawai’ ka manifestu kona-ba “LAUDATO SÍ” atu promove kuidadu ba uma komún: hili foer ba tau iha nia fatin ne’ebé loos no hatudu ezemplu pratika nian atu tau-matan ba ambiente ne’ebé saudavel.

Ikus nian taka ho orasaun, merenda hamutuk no simu prezente hafoin ida-idak fila ba uma ho ksolok. Agradese tebes ba oratorianu sira nia presenza hamutuk labarik no foin-sa’e na’in 58 no animadór/a sira sira. VIVA DON BOSCO!