Cassa  (Ainaro-TL) – Misaun iha Cassa hahú depoizde pedidu husi Amu-Bispu virgílio SDB atu tulun komunidade sarani Cassa ne’ebé hela iha periferia. Nune’e depoizde bá haree fatin iha Novembru 2016, misaun ne’e hahú ho prezensa Irmán FMA sira-nian durante tempu forte. Tempu forte sira-ne’e mak adventu no Kuarezma. Atividade pastorál sria ne’ebé hala’o mak katesizmu ba sakramentu Eukaristia no Konfisaun, oratóriu no vizita família sira.

Iha 9 Janeiru 2021, hahú prezensa iha Cassa ho Irmán Sebastiana no Ir Ana Rosália. Sira hela iha-ne’ebá atu hala’o ho  modu estavel atividade sira temi iha leten. Prezensa la’ós komunidade, maski hela iha Cassa sira pertense ba komunidade Casa Provinsiál/Novisiadu (Dili). Depoizde tinan ida prezensa nian, sei sai komunidade. Irmán sira iha Cassa iha loron 5 Janeiru 2022, sai ona na’in tolu: Ir Sebastiana, Ir Arménia no Ir Teresa. Ita hein atu sira lakleur bele ona forma komunidade, hodi Na’i Maromak nia hakaran no Inan Auxiliadora nia protesaun.

Irmán sira iha 2021 hela iha uma ida uluk rezidénsia ba mestre sira ne’ebé pároku hadi’ak. Uma ne’e hetan estragu depoizde referendum iha 1999. Maibé, fatin seidauk adekuadu atu hela bá, nune’e mak, oras ne’e entrega ba badaen ida rai-na’in atu hadi’ak filafali, hodi bele iha kondisaun di’ak uitoan ba Irmán sira no sira-nia apostoladu. Porenkuantu Irmán na’in tolu sei hela iha família ida nia uma ne’ebé oferese ba sira.

Cassa mak subdistritu ida Ainaro nian, no tebes duni, seidauk iha kongregasaun ida hela iha-ne’ebá, no mós la iha amlulik rezidensiál, enkuantu pároku bá vizita de’it iha Domingu ba selebrasaun eukarístika.

(Comsocial Tin)