Dili – Ho ksolok boot ohin loron 26/12/21, hamutuk ho família doben sira, ami selebra Festa Sagrada Família nian.  Sagrada Família mak sai hanesan modelu prinsipal ba ita ida-idak nia família.

Iha festa ne’e ami hahú ho Santa misa ne’ebé prezide husi Pe. Manuel Pinto, SDB. Iha ómelia Padre ko’alia konaba importansia Sagrada família nian.  Jóse no Maria ne’ebé preukupa hodi buka Jesus, durante loron tolu nia laran. Sira la hanoin konaba sira nia kole, maibé sira tau interese maka’as hodi buka Jesus to’o hetan Nia. Jesus husi nia parte obedese hodi fila hamutuk ho sira ba Nazare. Ida ne’e mak modelu di’ak liu ne’ebé Maromak tau iha ita nia oin atu ita aprende husi Sagrada Família ne’e.

Nune’e ita nia Família mós sai hanesan famiília ne’ebé sagrada, tanba moris rasik mai husi Maromak, liu husi ita nia inan-aman, ida ne’e Maromak nia grasa no bensaun ba ita nia família. Maromak nia inisiativa hodi krea feto no mane hodi hakonu iha sira ho kmanek oin-oin. Iha família mós iha difikuldade barak, maibé difikuldade halo ita pasiénsia ba malu liu tan, liu husi diálogu, rona no komprende malu, tanba família mak sai hanesan xave ba mudansa Mundu nian. Família saudavel mak lori mudansa ba Nasaun no Kreda hodi aprende liutan virtude di’ak sira husi sagrada Família Nazare nian.

Tinan ida nee la halo formasaun ho inan aman maibe usa formasaun Estreia Reitor Mor nian hodi forma puzzle hafoin sharing konaba liafuan sira ne’e ninia signifikadu iha familia nia laran. Liafuan sira ne’e hanesan laran luak, sakrifisiu, domin, ksolok no seluk tan.

Misa hotu, ami hala’o konfraternizasaun hamutuk, halimar jogus ne’ebé prepara ona husi grupu animasaun no aprezentasaun dansa ho knananuk husi família sira. Taka festa ida ne’e Ir.Angelita fob a familia idaidak Kuadru kiik Maria Auxiliadora nian. Agradese ba loron ohin nebe furak tebes!

(Honoria Santos)