Laga (Timor-Leste) – Foin-sa’e sira besik 850 husi parókia sira Kreda Katólika Timor-Leste halibur malu husi loron 6 to’o 12 Agostu iha parókia S. João Bosco, Laga (dioseze Baucau) ba sira-nia enkontru anuál hamutuk ho Krús Joven. Durante kongresu ne’ebé hala’o iha semana tomak, aleinde atividade konvíviu, orasaun nian, iha mós momentu formasaun ne’ebé hato’o husi palestrante oioin. Entre sira ne’e, mak Ir. Paola Battagliola, provinsiál irmán saleziana sira nian (FMA) ho tema kona-ba identidade pesoál no sarani. Molok hahú ninia palestra aspirante sira husi Komunidade Balide hato’o drama badak no dansa fita kór oioin nian nu’udar símbolu unidade iha diversidade. Kór oioin simboliza hahalok/atitude oioin maibé sira ne’e hotu forma ema integrál ho ninia identidade espesífika.

 

 

Tuirmai ne’e testu integrál ir Paola ninia liafuan sira ba kongresista sira:

 

«Foin-sa’e doben sira,

Ha’u haksolok tebes hasoru imi.

Esperiénsia ne’ebé imi hili atu partisipa iha eventu Krús nian maka prezente ida ba imi-nia moris rasik no ba parókia ne’ebé imi hola parte ninia vitalidade.

Imi nia prezensa boot iha ne’e  iha signifikadu kle’an. Ha’u lee nu’udar desizaun momoos ida husi parte hotu, atu uza ho konxiénsia tempu rasik hodi habiit fiar iha valór umanu no sarani sira.

Esperiénsia ida-ne’e, se imi ida-idak moris hodi envolve an iha nia, nia sei muda buat ruma iha imi-nia moris rasik. Imi labele fila fali ba imi-nia parókia, ba imi-nia família hanesan imi foin mai iha ne’e! Enkontru ho Kristu nia krús tenke nakfilak imi-nia moris, tenke lori imi atu “rona” lia-husun kle’an sira ne’ebé horik iha imi-nia fuan. Imi sei fila husi esperiénsia ida-ne’e la’ós ho “lia-hatán” sira prontu ona maibé ho hakaran boot ida atu kontinua buka Jezús, Liafuan moris nian no lialoos nian. Nia De’it maka lia-hatán ba buat ne’ebé imi buka.

Ha’u fiar maka’as katak iha ida-idak nia fuan soi hakaran ida, kuaze espetativa ida ne’ebé husi nia subar-fatin hakarak hatudu an: ema ko’alia barak kona-ba identidade no ha’u fó fali naran seluk: vokasaun, bolun-hatán nian, maibé… oinsá HA’U bele komprende HA’U-NIA IDENTIDADE? Sá de’it pasajen importante sira ne’ebé tenke halo atu HA’U bele sente “SÉ MAK HA’U”, sá loos  HA’U-NIA fatin iha realidade ne’ebé haleu ha’u no interpela ha’u no oinsá ha’u bele halo dalan atu bá to’o iha ne’ebá?

Identidade PESOÁL

“Ha’u bolu ó hodi ó-nia naran” – mak tema fundamentál iha Bíblia.

Ha’u la’ós númeru ida katuir nian. Ha’u mak ema ida laiha seluk hanesan, úniku basá Maromak “bolu ha’u ho naran”.

Realidade ida-ne’e, ne’ebé komunika mai ha’u Maromak nia Liafuan bele hanaran “identidade pesoál” ka “ha’u-nia orientasaun moris nian”, ka “ha’u-nia AN/EGO kle’an liu” ka  “ha’u-nia vokasaun pesoál”. Bíblia indika liafuan vokasaun nu’udar Maromak nia bolun no ema nia resposta ba orientasaun espesífika ida moris nian.

Ita ida-idak hetan iha ninia identidade pesoál ninia modu ÚNIKU atu saran an no enfrenta esperiénsia ida-idak moris nian. Ha’u la’ós ema seluk nia fotokópia: se ema hotu halo buat ne’e, ha’u mós halo, se ema hotu halo buat seluk, ha’u hakarak sai hanesan sira seluk.

Ita la moris ba an rasik maibé atu sai parte mundu ida nian, sosiedade ida nian ne’ebé simu bolun atu harii nia an tuir Maromak nia Projetu no Nia sura ho ita ida-idak nia kontribuisaun atu kolabora ho Nia iha ninia misaun salvasuan nian ne’ebé krús ida-ne’e maka sai nu’udar ninia sinál.

Iha lia-husun esensiál ida ne’ebé presiza hatán: “Sé mak ha’u; sá loos Maromak nia projetu mai ha’u?”

Iha dezafiu ida ne’ebé ita hotu simu: aprende atu HATEKE BA FUAN LARAN basá ha’u la’ós buat ne’ebé ema seluk dehan kona mai ha’u ka hakarak husi ha’u.

Ita ida-idak iha imajen ida kona-ba an rasik ne’ebé maizumenus konxiente. Imajen ida ne’e inklui iha nia an akontesimentu no faktu hotu ne’ebé akontese ona. Ita bele dehan katak, iha sentidu ida, ema ida-idak maka ninia ISTÓRIA ne’ebé husi parte ida nia rasik maka harii ho ninia hilin rasik, ho ninia “reasaun” sira (la’ós de’it buat ruma ne’ebé mai husi li’ur).

Ha’u-nia istória maka fatin iha-ne’ebé Maromak hadomi ha’u no salva ha’u.

Pasajen fundamentál dahuluk maka hahú atu hadomi ita-nia istória pesoál, atu gosta an rasik nu’udar an rasik ne’ebé iha, atu simu an rasik nu’udar hahalok ida domin nian.

Se ha’u la hadomi ha’u-nia an, ha’u labele simu ha’u-nia an no sente ha’u-nia an nu’udar prezente ida no ha’u labele halo dalan atu to’o iha baburas iha identidade sarani, hasoru dinámika ida bolun-resposta nian ba projetu ne’ebé Maromak iha mai ha’u. Ita simu konvite atu fó konfiansa, atu hatasak hateken pozitivu ida ba ita-nia an rasik no simu ho laran-di’ak buat ne’ebé halo parte ba ita, hahú husi aseitasaun ba ita-nia realidade, ita-nia família, amizade sira.

Imi foin-sa;e sira ho kbiit ne’ebé mai husi Espíritu Santu, imi bele sai protagonista ba hilin no asaun pozitiva sira, hodi halo imi nafunan, liuhusi hilin livre moris sarani nian, valór umanu fundamentál sira ne’ebé kultura atuál buka atu halakon hodi neutralidade no respeitu ba ida-idak nia liberdade nia naran: kultura moris nian, dignidade ema nian, solidariedade, justisa, dame.

Ita hatene katak liberdade loos konsiste iha realiza projetu Maromak nian iha ema ida-idak nia istória no iha umanidade tomak.

Imi maka tempu prezente no futuru Kreda nian no sosiedade Timor-Leste nian! Sira hein husi imi sidadania ativa ida, nakonu ho esperansa no forte iha fiar. Imi keta kole atu buka lurón sira emepeñu nian iha vida sosiál no iha Kreda nia laran (parókia, dioseze). Ida-ne’e mak imi nia oras! Iha sentidu ida-ne’e importante tebes sai konvensidu katak ida-idak, imi ida-idak iha responsabilidade ida tanba ema ida la bele moris iha izolamentu, maibé  parte sosiedade nian, Kreda nian no buat ne’ebé ema ida-idak moris fó impaktu ba mundu, maski la haree. Buat ne’ebé ha’u la halo, ema seluk labele halo iha ha’u-nia fatin.

Maromak maka maksoruk/soru-na’in boot ida ne’ebé tau hamutuk ita-nia ezisténsia nia lahan sira atu realiza obra boot ida tuir ninia Projetu. Jestu ida-idak domin nian, obra di’ak ida-idak, espresaun ida-idak laran di’ak nian, liafuan konstrutivu ida-idak, hanoin ida-idak esperansa nian bele troka mundu!

Tuir Jezús no halo nia sai prezente

Ohin loron la’ós fasil la’o tuir lurón ida ne’e, maibé posivel, basá imi la mesak. Jezús la’o ho imi: “Ha’u hela ho imi to’o tempu nia rohan”. Ninia liafuan fiar-belek basá nia saran nia moris atu ita hotu sai haksolok “iha tempu no iha eternidade”, hanesan Don Bosco baibain dehan ba ninia foin-sa’e sira.

Jezús maka imi-nia belun ne’ebé husu seriedade no ksolok iha empeñu konkretu, loroloron.

Foin-sa’e doben sira, ha’u hakarak dehan ba imi katak imi-nia fuan nakonu ho posibilidade atu kontribui ba imi-nia nasaun nurak ninia konstrusaun, se imi sai foin-sa’e ho kapasidade atu harii imi-nia identidade sarani, hodi harii relasaun pozitiva, relasionamentu auténtiku amizade nian.

Iha sosiedade ida kompleksa no lahanesan, imi simu bolun atu realiza ho konviksaun kle’an relasaun nakloke no respeitoza ho sira ne’ebé moris iha imi nia sorin no sira imi hasoru iha eskola, iha ambiente serbisu nian, iha grupu, iha lurón… Iha oportunidade sira loroloron nian imi iha posibilidade atu hasoru ema sira ne’ebé la hanoin hanesan, ne’ebé esprime opiniaun dook husi imi-nian. Karik bele iha mós ema ne’ebé presiza imi ba liafuan ida korajen nian, esperansa nian.

Fó liután, ba sira ne’ebé iha menus husi moris, liuliu se sira presiza amizade no domin. Atu bá hasoru foin-sa’e sira ne’ebé kiak liu iha domin presiza halo atu imi-nia vida sai don ida ba ema seluk, hodi haluha an rasik. Imi hanoin kona-ba fini-musan ne’ebé evanjellu ko’alia kona-ba nia, ne’ebé mate atu fó fuan? Krús ne’ebé ita ohin kontempla iha ne’e ko’alia duni kona-ba buat ne’e….

Ohin imi iha ne’e atu moris esperiénsia ida ho Jezús, atu hasoru Jezús, Dalan, Lialoos, Moris!  Bainhira hasoru ona Jezús, imi labele ona nonook! Aten-barani bá atu aprezenta imi nia an iha fatin hotu ho identidade momoos ida” : identidade kristán/sarani! Imi keta ta’uk atu ko’alia kona-ba Kristu.

Kristaun signifika ema Kristu nian no imi mak Kristu nian! Agora mak imi-nia oras!

Ho relasaun di’ak iha moris loroloron nian imi koko ksolok atu harii sosiedade ida oinseluk, hahú husi imi-nia família, imi-nia distritu. Nune’e maka  bele iha sínteze entre sarani di’ak no sidadaun onestu!

Jezús hadomi imi, no hein husi imi protagonizmu ida sidadania ativa nian ne’ebé liga metin ho fiar ne’ebé ativu, relasaun pozitiva, domin gratuitu ba sira ne’ebé kiak liu.

Ho Nia no iha servisu ba ema seluk imi bele espesifika imi-nia projetu moris nian, imi-nia futuru. Se Jezús halo imi sente nia bolun: “Imi mai no haree: imi hatán ho konfiansa no ksolok: “Ha’u maka ne’e”. Bainhira Na’i bolu ne’e katak nia iha konfiansa boot iha imi no hakarak imi-nia kolaborasaun ba foin-sa’e barak nia salvasaun.

Maria, Feto Sín kondisaun-laek nian la’o iha imi ida-idak nia sorin: Nia koñese di’ak ninia Oan-Mane no bele fó indikasaun di’ak atu komprende no tuir ninia hakaran sira.

Ha’u konvida imi atu haksolok ho identidade sarani no sai masin no roman no fó sasin katak posivel moris santidade no tuir Jezús hodi saran vida tomak. Imi aten-barani bá iha buat ida-ne’e no keta husik atu iha ambiente hotu, ba ema hotu falta Na’i nia prezensa.

Ida-ne’e maka, foin-sa’e doben sira, buat ne’ebé ha’u rai iha ha’u-nia fuan no hakarak fahe ho imi. Buat ne’ebé imi sei moris iha loron furak hirak ne’e maka aventura pozitiva ida ba imi-nia hakaran amizade nian, konfrontu nian, enkontru nian ho Kristu nia krús, dalan salvasaun no santidade nian. Loron hirak ne’e sai trampolín ida atu hakat ba oin, atu kontinua hamutuk pasu firme  ida atu moris iha ksolok no iha domin gratuitu. Imi sei fila ba uma no ba imi-nia parókia sira ho naroman foun, riku iha ksolok no iha esperansa.

Ha’u promete ba imi orasaun ida, atu imi bele sai nafatin foin-sa’e ativu, katak sarani di’ak no sidadaun onestu iha kreda no iha sosiedade.

Ne’e mós mak ha’u nia votus ba imi. Obrigada ba imi-nia atensaun».