Dare, loron 19 fulan Dezembru 2021, ami husi grupu Foin sae Voluntariado Salesiano Palomino halo retiru hamutuk ho grupu infáncia Missionária no Animador oratorio nian balun iha Igreja paroquial São Francisco Xavier iha Dare, maske balun sei ocupado ho sira nia esame no knar seluk maibe ami grupo kiik ida ne’e agradese tebes ba oportunidade ne’ebè hetan. Ho objektivu atu tulun ami foin sae sira atu rekoñese no brani husik hahalok nakukun nian ne’ebé kontra ami-nia rasik,  hasusar maluk sira no la repesta natureza mak hahalok sira ne’ebé hadook ita ema husi Maramak nia grasa no Nia domin. Atu bele sente kmanek Natal nian, katak simu Jesus Dame Na’in iha kalan Natal presisa tebes atu prepara fuan no ambiente diak.

Iha retiru ne’e,  madre Julia tulun ami  hodi halo reflesaun kona ba Evanjellu S. João 1,1-4 “Maromak nia Lia Fuan Halo -An ba Mane no mai horik iha ita le’et”.  Madre konvida ami atu halo reflesaun kona ba Maromak nia domin boot ba umanidade hodi haruka nia Oan mai moris iha rai hola parte ba familia umana ida, moris iha kontestu konkretu no iha lei nia okos. Maromak kreador ne’ebé Krea buat hotu mesak furak, krea ita ema tuir Ninia ilhas atu bele kontinua iha relasaun intima ho Nia. Tan ita nia Maromak mak ema relasaun nain, nia hakarak tebes atu hadome malu ho ita ema, depois de Adão ho Eva monu ba sala, Nia buka dalan oin oin atu ita ema bele rekonsilia an fila fali ho Nia, Nia lakoi atu ita hela iha nakukun sala nian, maibe ho aten brani hamriik hodi moris iha naroman nia laran. Maromak ho Domin Boot  hatudu Nia An ba ita ema iha kalan Natal, hasoru malu ho ita ema hodi hola ilhas Kosok Oan ida nian, iha nebe presisa ita nia domin no hakbesik an ba Nia.

Depois de reflesaun ami dedika tempo ba reflesaun no orasaun pesoal iha natureza furak liu  haleu Parokia Dare no halo esame de consciencia hodi hakbesik an ba sacramento reconsiliasaun iha uma Retiro Dare. Agradese tebes  ba padre Jose Mariano nia laran luak no disponibildade tomak ho ami.

Konfesa hotu tiha no depois de han meudia ami buka komprimeta malu ba Festa Natal nian ho figura sira ne’ebé hetan iha Evanjellu Lukas no Mateus kona ba Natal Nai nian ho drama rua. Drama sira ne’e tulun ami atu prepara an hodi la’o dadaun ba Belem atu adora Nai Maksoin

Ami remata loron retiro nian hodi kontinua kontempla Maromak nia Natureza hakmatek no fresco Dare nian no reza hamutuk iha gruta Nai Feto hodi agradese ba Nai nia protesaun no diak hotu ne’ebé ami simu iha loron ida ne’e. Ikus ami hakat ba  fatin turistika iha ne’ebé ema hanaran “Menara Paris” hodi kontempla sidade Dili no natureza diak liu tan husi leten, haksolok ho Maromak nia presenza ne’ebé ami bele hetan iha fatin furak ida ne’e.

Obrigadu barak

(FVPS, Agustinho)