Iha 8 Dezembru, no iha Tempu Adventu nia laran, ita selebra Solenidade Imakulada Konseisaun. Ne’e mak festa hahú absolutu, hanesan S. Paulo Vi afirma, bainhira Maromak ho ninia insiativa rasik, no hodi prepara nia oan nia hiit an mai, prezerva Virjen Maria husi salan orijinál nia foer, atu iha plentude grasa nian nia sai inan ne’ebé digna ba nia Oan. Kreda sempre venera Maromak nia Inan nia santidade ho nia fuan ne’ebé nakliis tomak ba Maromak. Ho modu ne’e, ita haninu eh observa Maria nu’udar feto “nakonu ho grasa” (Lc 1,28), ne’ebé anju kumprimenta iha Anunsiasaun.

Iha 1854, iha loron 8 Dezembru, mak Papa Pio IX deklara lia-loos fiar nian kona-ba Imakulada Konseisaun Maria nian, doutrina ida ita hetan iha Maromak nia Revelasaun. Prosesu ida ne’ebé kulmina ho definisaun dogma  nian  iha kontestu luan liu no kompleksu, ho akontesimentu sira ne’ebé marka no transforma sékulu XIX tomak. Prosesu definisaun dogma nian hetan influénsia husi kestaun lubuk ida ne’ebé Kreda labele tau sees, no entre sira-ne’e, Maria nia figura.

Iha tinan 2021, ita selebra tinan 167 dogma ne’e nian. Ho bula “Ineffabilis Deus”, iha 8 Dezembru 1854 Papa Pio IX deklara Imakulada Konseisaun nu’udar dogma. Iha Kreda nia istória devosaun ba Imakulada Konseisaun okupa fatin destake nian, molok definisaun no proklamasaun dogma ne’e nian.

Kona-ba istória dogma nian, ita lee katak doutrina santidade orijinál Maria nian hahú iha Oriente iha sékulu VI ka VII no husi ne’ebá to’o iha Osidente, hamutuk ho festa litúrjika ne’ebé introdús iha Itália, hafoin ba Inglaterra no Fransa. Foufoun selebrasaun ne’e nia títulu mak “Santa Ana ko’us Maria”, hafoin troka ba “Imakulada Konseisaun.

Mai ita membru sira fiar Katólika nian, Imakulada Konseisaun la’ós de’it signifikativu, maibé esensiál. Tanba hodi Maromak nia grasa, salan la kona Maria. Maromak prepara nia atu sai Jezús nia Inan sala-laek, ne’ebé hodi nia moris, mate no moris-hi’as, kasu ita husi salan. Hodi Maria nia konseisaun lahó salan, hodi nia “sim” ba Maromak, ita hetan salvasaun, no simu promesa moris rohan-laek hodi Maria nia Oan, Jezús.