Fuiloro – Loron 1 Dezembru, loron ne’e sai loron espesiál ba menina kursu sira husi Centro Formasaun Secretariado e Costura Maddalena Morano Fuiloro, ne’ebe simu graduasaun ho total graduada hamutuk 52. Area Administrasaun Jeral 50, Costura 2.

Iha Serimónia ne’e hetan partisipasaun husi Director DNAFOP Sr. Mateus.W dos Santos Tallo, nu’udar  reprezentante Secretario Estado da SEFOPE, Madre Provincial Timor- Indonesia, Madre Alma Castagna, FMA, Secretario Municipio Lautem, Sr. Jacinto da Costa, partisipa husi Director/a kada Menisteria sira ne’ebe hola parte ba Municipio Lospalos / Lautem no mós Inan Aman familia graduada sira nian.

Mensajen badak husi Madre Alma ba graduada sira mak fó korajen ba sira tanba esperensia ne’ebe sira hetan iha fatin idane’e, hanesan priveléjiu ida tanba iha tempu pandemia nia laran menina sira nafatin halao kursus tanba hotu -hotu hela iha kolejiu laran. Buat barak ne’ebe imi simu iha fatin ida ne’e sai mós responsabilidade ida ba imi atu forma imi nia personalidade sai ema tasak iha matenek no hahalok.

Reprezentante Administrador Municipio Lautem, Sr. Jacinto da Costa ne’ebe hato’o liafuan murak ba graduada sira kona ba oinsá sai ema ne’ebe matenek serbisu iha edifisiu oin-oin ho maneira profissional liu husi skill ne’ebe aprende iha fatin ida ne’e. Nia mós fó korajen ba graduada sira katak ita ida-idak tenke fó buat ne’ebe diak mai  husi ita nia an rasik duke ita simu no husu deit saida mak nasaun ne’e sei fó mai hau.

Sr. Mateus nu’udar reprezentante Secretario Estado da SEFOPE fó mós diskursu badak katak ho Politika Formasaun Profissional mak buka hassae ema nia kapasidade atu hasoru dezafiu foun no mós mudansa social ne’ebe mósu iha ita nia nia rai laran. Tinan ne’e SEFOPE sei esforsu nafatin atu fó tulun ba Sentru ne’e rasik tanba Sentru ne’e produz ona joven barak ne’ebe serbisu iha Ministerio oioin iha Timor laran.

(Ines Bartolo FMA)