Fuiloro 15 Novembru, loron ne’e sai festa boot ba ami nia komunidade ne’ebé foti naran husi Beata Maddaleno Morano. Foin-sa’e feto sira iha Koléjiu laran hamutuk 108 (Menina ETA ho Kursus Computer e Costura) no mós Irmán no Kolaboradores sira ho ksolok selebra festa ne’e ho entuziasmu.

Ami nia orasaun hahú kedas husi dadeer, nu’udar komunidade ne’ebé hamahan an iha Uma Morano hasae hahí no agradese ba Maromak liu husi Orasaun Laudes hamutuk ho menina koléjiu no iha kalan ami hamutuk hasae Eukaristia Santa ne’ebé prezide husi Padre Venancio Fatima Freitas, SDB.

Iha omilia Padre subliña liu kona ba Madre Morano nia Domin boot hodi fó an ba Maromak liu husi nia vokasaun nu’udar Relijioza FMA , Edukadora no mós Katekista ne’ebé fahe liafuan Kristu nian ba ema sira ne’ebé nia hasoru.

Nu’udar FMA, Madre Maddalena Morano kontribui atu komunidade FMA sira sai knuuk atu vokasaun sira buras. Iha nia moris, Evanjellu no Konstituisaun sira, espíritu Mornese no Nizza nian, klima karizmátiku orijin nian, Espiritualidade Saleziana ne’ebé nia sai sasin iha Irmán dahuluk sira, sai pontu referénsia ba nia no  hola isin iha nia.

Buat hotu ne’ebé nia halo nafatin iha intensaun katak Domin mak sai fundamentál ba nia vokasaun no misaun, liu-liu atu salva klamar barak ba Maromak.

Ami harohan atu menina sira bele deskobre vokasaun Maromak nian ba sira-nia moris atu hetan ksolok, hodi hala’o iha fidelidade.

(Ines Bartolo FMA)