Dili – Iha loron 26, fulan Outubru 2021, ami husi grupu Foin-sa’e voluntariadu Palomino Salesiano partecipa programa ida husi grupu Habelun ho Tasi, ne’ebé hanorin ami no fahe sira-nia koñesimentu konaba Potencial sira husi ita-nia tasi Timor-Leste, maun no bin sira husi grupu Habelun ho Tasi, sira aprende liu husi programa Sustainable Marine Tourism, organiza husi compañia COMMPAS DIVING TIMOR-LESTE no hetan suporta husi USAID.

Ami sente orgullu loss bainhira ami partisipa programa ne’e tamba iha materia ne’ebé foun no koñesimentu ne’ebé foun mai ami hodi aprende iha momentu ne’eba, hodi hanorin ami oinsa atu promove ita-nia setor turismo no fo potencial mai ita, oinsa atu hatene biodiversidade moris tasi nian iha ita-nia rai, no oinsa atu protege ita nia rikusoin biodiversidade tasi nian, seluk husi ida ne’e mos iha parte ida hanaran facts check ne’ebé hanesan koñesimentu geral konaba buat moris ruma, iha programa ne’e bin no maun sira koalia konaba animal tubaraun no lenuk, no iha konhesimentu foun ne’ebé mak ami foin rona husi animal rua ne’e mak hanesan tuir mai ne’e, konaba animal tubaraun, nia hanesan animal ne’ebé protegidu no importante tebes iha biodiversidade tasi nian hodi halo balansa moris ba ikan-koral no fo moris mos ba koral, no nia mos hanesan animal ne’ebé mak latoba durante nia moris tomak no halo viagem lao husi kontinente ida ba kontinente ida, animal tubaraun ne’e mos laos animal ne’ebé mak perigu ba ita ema tamba sira lahan ita ema, maibe sira bele tata ita bainhira ita halo sira tauk, maibe sira lahan ita, tamba sira nia inus ne’e kuandu horon ran ema nian sira sei lahan no sira hatene katak ne’e laos sira nia hahan, so ran animal nian mak sira han ne’ebé ita labele tauk. Konaba Lenuk, nia hanesan animal ne’ebé protegidu no nia hanesan animal ne’ebé mak iha tolu no nia tolun subar iha rai-henek tasi nia laran, no nia bele tolun too 200 maibe sei iha lenuk rua ou tolu deit mak bele to’o idade joven, fatin ne’ebé mak nia tolun bá nia sei mai fali kuandu nia atu tolun tan no perigu kuandu ita halo uma ou ita halo fatin ne’e oin seluk tiha, iha fatin ne’ebé sira tolun bá, ne’e sira sei buka tan fatin seluk dalaruma fatin seluk nia temperatura ladiak bele estraga tan mantolu ne’ebé iha, no lenuk ne’e mos nia sempre viagem haleu mundu hodi buka hahan ne’ebé sira presiza, sira nia hahan mak hanesan budu tasi no jellyfish.

No bainhira, maun no bin sira husi grupu Habelun ho Tasi loke filmazen badak ida ne’ebé koalia konaba biodiversidade iha ita nia tasi Timor (ne’ebé kria husi sr. Andy Man bainhira nia mai vigita ita-nia rai Doben Timor iha tinan 2020), ami hotu hakfodak tamba laimagina katak iha ita nia tasi existe ikan ho koral ne’ebé mak furak no ho kor ne’ebé oinoin, halo ami labaruk atu hare fila fali filmagem ne’e, no halo ami hakfodak liu tan bainhira rona katak ita-nia rai doben Timor-Leste, ema hanaran THE LAST KINGDOM OF CORAL tamba riku ho coral no ho ikan ne’ebé oinoin, no momentu ne’eba ami hotu orgullu no agradese loss ba Aman Maromak nia kriatura sira ne’ebé halo animal-moris oinoin ho furak tuir sira nia moris ba, laos tasi deit maibe rai maran mos.

Tan ne’e, hanesan orgulho boot ida mai ita tamba ita-nia rai haleu ho tasi no riku ho biodiversidade oinoin, maibe ema barak mak sei falta konxiensia husi ekologia, hodi soe foer arbiru, kaer ikan liu kuantidade ne’ebé presiza, hamate animal tasi arbiru, tesi ai-horis arbiru hodi fo impaktu mai ita no biodiversidade sira ne’ebé moris iha tasi no rai maran.

Hanesan Santu Padre Francisco nia liafuan ne’ebé dehan mai ita katak, iha livru Genesis, bainhira Maromak halo lalehan no rai, no mos buat moris sira bainhira kria los ona tuir Nain-nia hakarak, Maromak mos lahaluhan atu kria tan ema hodi sai hanesan nain no tau matan ba Nain-nia obra sira, tan ne’e ita tenki kuidadu buat hotu ne’ebé Maromak fo mai ita, laos atu estraga maibe atu kuidadu, respeito no agradese kriatura furak sira ne’ebé Maromak fo mai ita.

Mai ita hotu hamutuk hodi kuidadu ita nia ambiente no ita-nia biodiversidade sira, atu labele lakon, mate no estraga iha futuro oin mai tamba ita mak nain no atu kuidadu kriatura sira ne’e.

Agostinho da Silva Ribeiro