Dili – Iha loron Sábado, 06 Novembro iha komunidade São José-Noviciado Komoro-Dili halao ami nia Lectio Divina “ Samaritanu diak”nu’udar preparasaun ba Festa Agradecimento Inspetorial, iha modu particular agradese ba Madre Inspetora. Ami membru komunidade tomak hamutuk ho trabalhadores balu no kolabadores husi ADMA Tasi-tolu nian. lectio ida ne’e interesante tebes tamba hateke hateke ba “Samaritanu diak” nia hahalok lori ami atu hare mos ba Dokumento “Fratelli Tutti” ka ”Ita mak maun no bin alin sira”, ne’ebé koalia kona ita hotu mak maun no bin alin sira no oinsa ita taumatan ba malu.

Iha oportunidade ne’e ami reflete, haklean no fahe ami nia hanoin sira ba malu hodi halo relasaun entre Pasajen Sagrada Eskritura, Dokumentu Kreda nian ne’ebé refere ho Me. Alma nia moris. Ami agradese tebes ba Madre tamba hanesan Samaritanu diak ne’ebé lao rai, Madre nu’udar Misionária ida mai iha rai Timor hodi sai bin no inan ida ne’ebé preokupa ba FMA ida-idak, foin sa’e no labarik kiak sira nia diak. Samaritanu diak konsiente ba ema ne’ebé monu iha dalan no tau matan ba ema ne’e, ami hare iha Madre attitude ida ne’e forte tebes, hanesan iha tempo sira ikus ne’e, ho pandemia ne’ebé la hotu deit, Madre nafatin fo atensaun ba Irmán ida-idak atu prevene-an husi moras ne’e no seluk tan. Samaritanu diak tau tua ba ema moras nia kanek hodi kura nia, ami hare attitude ne’e iha Madre, oinsa ho Madre nia atensaun, domin no liafuan sira kura ema barak. Samaritanu diak buka fatin atu tau ema moras ne’e no loke nia karteira atu selu buat hotu ne’ebé uma nain gasta ba ema moras ne’e, iha tinan ida ne’e ami hare no esperiensia rasik oinsa Madre nia maneira loke matan, loke fuan no loke odamatan atu simu ema ne’ebé iha susar laran iha tempo pandemia no inundasaun ne’e. Tebes Madre nia prezensa sai tebes hanesan Samaritanu diak ida iha ami nia le’et no tulun ami esperiensia liutan saida mak hanaran “ita mak maun no bin alin sira”. Obrigada wain Me. Alma doben ba diak hotu ne’ebé ita halo ona ba ami. Ami kontinua reza ba ita atu simu grasa hotu ne’ebé ita presiza.

Ami agradese tebes ba oportunidade ne’ebé ami hetan atu realiza Lectio Divina ida ne’e, tamba ho Lectio ne’e halo ami hateke ba kotuk hodi agradese, moris tempo agora hodi aprende no halo diak no hateke ba futuru ho esperansa katak moris sei sai diak liu tan ho ami ida-idak nia prezensa.

(Noémia de Deus, FMA)