Dili – Iha loron 24 Outubro 2021, iha Escola Catolica Maria Auxiliadora Comoro halao enkontru vokasional ba foin sa’e sira ho nia tema: “Nai koalia ita atan rona” ne’ebe partesipa husi grupo barak mak hanesan Grupo Foinsae Voluntariado Palomino Salesiana, Fiat, COJUCAD, Infansia Missionaria, Oratorio JP II, Oratorio Ceferino Namuncura no 9 ano EBC 3 ciclo Maria Auxiliadora Comoro,Universidade ICS, grupo FIAT, grupo Coro Santa Cecilia Catedral, grupo Menina Divina Providensia, grupo banda Soldado Negro. Laos nee deit iha enkontru vokasional nee rasik mos hetan partesipasaun husi Irmán Filhas de Maria Auxiladora (FMA), SSPS, OSU no mos Familia Sr. Antonio de Luz nian. Total partesipante 225 ne’ebé ho entuziasmo no ksolok ense loron bo’ot ne’e ho esperiensia troka laek sira.

Seremonia ba loron refere, hahú ho dansa benvindu nian ne’ebé hatudu husi grupu FVPS, hafoin lia makloke husi Me. Julia Marcal, FMA neebe sai nuudar organizadora ba seremonia refere. Madre Julia esplika kona ba vokasaun oin oin ninia fafurak iha Kreda, uluk knanain: vokasaun ba moris, vokasaun sai Kristaun, vokasaun Matrimonial no vida Relijiosa. Tuir mai dramatizasaun ida husi grupu Infansia Missionaria n’ebé koalia kona ba Samuel nia vokasaun “Nai koalia ba atan oan rona” (1 Sam 3,1-12) ne’ebé konvida ami hotu atu fo tempu rona Maromak nebe bolu nafatin iha moris lor-loron.

Depois ne’e seremonia hahú kedas ho reprezentante Madre FMA sira, Me. Ermelinda Silva, FMA ne’ebé koalia kona ba Prezensa FMA nian iha Mundu no mos Timor. Iha Madre Erme nia aprezentasaun nia koalia kona ba Instituto nia misaun. Misaun FMA nian mak Edukasaun, atu tulun foin sa’e no labarik sira “sai sarani diak no sidadaun onestu”. Nia hato’o katak instituto FMA rasik eziste iha kontinente 5, espesifikamente iha nasaun 97 no iha provinsia Timor-Indonesia iha uma FMA hamutuk 13. Karisma FMA nian rasik mak haksolok nuudar dalan ba Santidade no Madre mos hatutan tan katak Madre FMA sira espesifikamente sakrifika sira nia aan tomak ba Maromak no ba salvasaun klamar foin sa’e no labarik feto no mane sira nian.

Hafoin de aprezentasaun badak husi reprezentante madre FMA, tuir mai iha mos representante familia, Sr. Antonio da Luz no Sra. Rosalina neebe fahe sira nia esperiensia domin iha familia laran. Iha nia aprezentasaun Senhor no senhora mos hatoo katak iha moris familia nian iha dezafiu barak neebe sira hasoru liu liu iha inisiu harii uma kain ida, deskonfiansa mak problema ida neebe sira hasoru iha sira nia familia. Tanis, hakseluk malu, hanoin atu husik malu too simu realidade mak reasaun balun ba problema neebe sira hasoru iha sira nia familia rasik. Maibe sira mos fo sasin katak orasaun mak sai nuudar chave ba esperansa iha familia laran nian, tan dalaruma situasaun neebe familia enfrenta la tuir espetativa neebe sira iha. Senhor no Senhora mos hatutan katak ho sira nia prezensa iha Coperadores Salesiano fo oportunidade ba sira tu servisu hamutuk, obedese ba malu, no oinsa moris diak iha familia laran liu husi orasaun.

Depois de Madre FMA sira koalia kona ba sira nia prezensa iha mundu no Timor, Madre OSU no Madre SSPS sira mos halo buat neebe hanesan. Ba Madre OSU rasik, harii iha 25/11/1935, adisionalmente madre hatoo katak sira nia ezistensia iha Timor nee rasik nuudar resposta husi konvite Monseniur Dom Martinho Lopes iha 1984 no madre sira fofoun mai iha Timor harii centro SPGAK neebe ho objetivu atu tulun fo formasaun fiar nian ba katekista no profesores religiao sira iha Diocese Dili. Iha mos Pe. Jojo, SDB ne’ebé mai fo sasin kona ba nia vokasaun nu’udar Salesiano no Missionário ne’ebé nakonu ho ksolok no dezafiu. Maski nune’e nia nafatin haksolok no entuziasmo atu halao misaun ne’ebé Nai Maromak saran ba nia liman. Hotu tiha hato’o Padre nia istória, Padre kontinua kedas Presidi Misa ba ami.

Molok atu fahe malu, foin sa’e sira hato’o sira nia hanoin no hakarak sira mak hanesan: ami agradese tebes ba Maromak no ba Madre sira tamba halo ami sente no hetan esperiensia barak hodi prepara ami nia-an atu hatan ba Maromak nia bolun; ami hakarak Madre sira anima nafatin joven sira atu nune’e sira besik liu tan ba Maromak; buat hotu diak ona, se bele konvida tan joven sira husi eskola no Parokia sira atu mai partesipa iha eventu furak sira hanesan ne’e; ikus nia “Nafatin haksolok hodi servi Na’i”.

Obrigada wain ba kolaborasaun, suporta no diak hotu ne’ebé oferese ona mai ami hodi realiza eventu interesante ne’e ho suseso. Maria Auxiliadora haraik bensaun mai ita hotu. Obrigada barak

(Vitória Soares)