Venilale – Iha 23 Outubru, Eskola Tékniku Vokasionál Madre Mazzarello Venilale selebra Tempu Kriasaun  nian (Season of Creation) hamutuk ho edukadór/a sira iha eskola. Selebrasaun ida ne’e tuir loloos realiza iha loron 4 Outubru liubá loron enseramentu ba tempu kriasaun “ Oikos” hanesan Papa Francisco haruka, maibé tamba tempu la permite nune’e selebra ohin. Objetivu husi selebrasaun ida ne’e mak atu kuda iha ami idakidak nia an nu’udar edukadór/a no estudante paixaun ba ita-nia “uma komun –Oikos” hodi hatene taumatan no harii. Selebrasaun ida ne’e responsavel husi Asosiasaun grupu Laudato Si .

Selebrasaun fahe ba etapa rua. Etapa dahuluk mak momentu orasaun no komprimisu nian, ne’ebé fahe ba momentu 7 iha ne’ebé kada asosiasaun hetan ninia parte atu hahi, hana’i no agradese ba Aman Kriadór, ne’ebé kria buat hotu mesak furak no kmanek. Iha momentu orasaun ne’e mós mak momentu husu perdaun ba hahalok ita ema nian ne’ebé la responsavél ba ita-nia “OIKOS” – Uma Komun. Nune’e, liu husi orasaun ne’e mak momentu hafoun ami-nia relasaun ho Ita-nia Kriadór ho no kriatura tomak ne’ebé Maromak entrega ba ita hahu kedas Maromak kria mundu no buat hotu.

Iha etapa daruak mak atividade. Iha momentu ne’e kada asosiasaun aprezente ba asemblea pasajen Bíbliku kona-ba kriasaun nian iha Jénezis liu husi drama, dansa no knananuk. Hafoin kontinua ho kuda ai-oan sira.