Baucau – Husi 15 – 17 Outubru, tinan-tinan Diocese 3 nafatin selebra hamutuk loron mundial Missaun nian iha ne’ebé halibur hamutuk grupo OPIAM sira husi Diocese 3 maibé tamba razaun Covid-19 tinan 2 tutuir malu la realiza kongresu ba grupo OPIAM hamutuk ho Diocese 2 seluk (DILI no MALIANA). Maske ho situsaun pandemia, Diocese Baucau hakarak hamoris fali misaun Pastoral iha parókia sira, liu-liu Misaun Pastoral ba Labarik sira, tan ne’e ekipa husi departamento MISSIO nian hakarak reativa fali grupo OPIAM hodi hala’o kongresu ida ne’e ho parókia sira Diocese Baucau nian. Ho intensaun ida ne’e mak iha dia 15-17/10/2021, Diocese Baucau hala’o kongresu OPIAM hamutuk ho parókia hotu no estasaun missionaria sira no komunidade relijioza sira ne’ebé iha grupo OPIAM, sira hotu mai partisipa iha kongresu ne’e, partisipantes sira hamutuk na’in 380 hamutuk ho animadores sira, parókia balun la marka prezensa tanba razaun grupu OPIAM la iha no razaun seluk tan. Kongresu ne’e ninia Tema mak “HUSIK LABARIK SIRA NE’E HAKBESIK MAI HAU” (MRK; 4:10) ne’ebé sai mos Tema jeral ba OPIAM Diocese Baucau nian.

Iha loron dahuluk Amo Bispo Baucau Don Basílio do Nascimento mak preside misa abertura ba kongresu OPIAM, iha ninia Homilia nia fó hanoin ba grupo OPIAM sira katak “ imi tama grupo OPIAM la’ós deit atu dansa kanta no aprende animasaun oi-oin, buat sira ne’e hanesan meios ida dada labarik sira maibe misaun importante mak “ F’o sasin kona Kristu ho imi OPIAM sira nia moris, halo imi nia maluk sira hateke ba imi, sira bele dehan ami hare hetan Kristu iha OPIAM sira nia moris” ida ne’e mak OPIAM nia missaun ne’ebé Essensial. OPIAM husi Laclubar mak responsavel ba Liturjia.

Iha loron daruak OPIAM husi komunidade Maria Ausiliadora Venilale mak anima Liturjia no Padre Aderito SDB mak preside Missa. Iha ninia homilia, nia mos enkoraja grupo OPIAM sira atu sai laran manas liu tan atu haklaken Kristu ba maluk sira seluk

Iha loron daruak kongresu nian I palestra Amo Bispo Don Basílio mak koalia ba OPIAM sira ho tema “AMI LABELE NONOK HO BUAT NE’EBE AMI HARE NO RONA”(ACT 4:20) Santo Padre nia mensajen ba loron Mundial Misaun nian. Amo Bispo dehan: Apostulu sira depois de Jezús Nia mate no Moris Hias, sira sai laran manas liután hodi fo sasin kona ba buat ne’ebé sira hare no rona, maske Judeu sira bandu atu sira haklaken kona ba Kristu, sira hetok sai laran manas liutan. Amo Bispu haforsa liutan imi OPIAM sira mos presija sai hanesan apostulu sira, labele ta’uk atu fó sasin kona ba buat ne’ebé imi hare no rona.

II palestra Amo Arlindo Leonardo mak Koalia ho tema “PAPEL ANIMADORES” nia foka liu ba animadores sira nia knaar lolos mak saida? Animadores sira mak sai hanesan: motivador, akompañadór, orientador, motor no matadalan ba OPIAM sira. Animadores sira labele lori labarik no Adolexente sira koñese deit animadores sira maibé liu-liu tulun sira atu koñese se mak Kristu no lori sira ba Kristu.

III Palestra Ir. Elisita Gonzaga, FMA mak koalia kona ba identidade no missaun OPIAM. Opiam nia identidade mak atu haklaken Kristu, fó sasin kona ba Kristu nia domin ba nia maluk labarik sira, Hatudu buat ne’ebé loos ba hau nia maluk sira, halo hau-nia hateken ba ema seluk hanesan Jesus Nia hateken, hatene lori ksolok ne’ebé loos ba ema seluk. Misaun opiam atu salva labarik inosentes sira, Atu halo sira sai dixípulu kiik misináriu nian, fo ajuda hanesan materiais, Morais, Intelektuais nebe labarik sira presiza iha fatin hot- hotu, kultura hot-hotu, rasa hotu-hotu, tulun labarik sira seluk liu-liu sira ne’ebé seidauk hatene Jezús Kristu.

Lokraik grupo opiam sira hala’o asaun karitativa hodi vizita familia sira ne’ebé presiza liu. Grupo Opiam husi paroquia ida-idak lori sira ninia kontribuisaun hodi tau hamutuk (fós, mina, sabaun, masin, café, kadernu, lapizeira, masin-midar, supermie, biskuit ,etc) . Familia sira sente haksolok no agradese ba tulun ne’ebé opiam sira rasik mak halo, kiik maibé hatene fahe ho ema seluk ne’ebé presija liu.

Depois de hala’o asaun karitativa, OPIAM sira halo kompetisaun diskursu ho tema “OINSA HAU HADOMI JEZÚS NO PAPA-MAMA”

Depois de Kompetisaun diskursu tuir kedas ho kompetisaun “DANSA HINO OPIAM”.

Hafoin iha kalan taka ho adorasaun Santíssimo iha Catedral nu’udar preparasaun ba abertura Sínodo ne’ebé realiza iha loron tuir mai.

Dia 17/10/2021 enseramentu ba kongresu Opiam, selebra loron Mundial Misaun nian ho tempo hanesan abertura ba Sínodo Bispu sira nian, hala’o iha Katedral Baucau, Amo Bispu mak preside Misa ho Ko-selebrante Amo Arlindo Leonardo, Amo Aderito SDB, Diacon Deonisio no Diacon João Paolo. Selebra misa ida de’it hahu tuku 8:00 OTL, iha Katedral grupo OPIAM hamutuk ho sarani sira, OPIAM mak responsavel ba Liturjia. Depois de misa Amo bispu Don Basílio Oficialmente hala’o abertura ba Sínodo no ho Banda Música, Amo Aderito mak responsavel no Koru husi Baucau.

Loron 17 /10/ 2021, Encerramentu ba Congresso OPIAM depois de misa no almoço hamutuk.

( Ir. Elisita Gonzaga FMA)