Dare – Dili Husi loron 10-13 Outubru realiza Kongresu DEJUCDIL iha Uma Retiru Dare, konvoka husi Prezidente Departamentu Juventude Católica Diosece Dili ( DEJUCDDIL) Pe. João Soares ho ekipa. Ho objetivu, halo revizaun no Apresiasaun ba estatutu DEJUCDDIL nian ne’ebé liu ona tinan Sanulu. Partisipante sira hamutuk na’in 50 ho representante Foin-sa’e Nivel Vigararia, hanesan: Foin-sa’e Católica Vigararia Same ( FOCAVISA), Foin-sa’e Católica Vigararia Ainaro ( FOCAVIA), Foin-sa’e Católica S. Pedru no S. Paulo Aileu (Vispepal), FOSCAVIER(ermera), Fosca Internu Dejucddil no Movimentu Juventude Sira: JUCAR – Juventude Carmelita, MAG+S Timor Leste, Movimentu Juvenil Salesiano (MJS), JBK, AMC (Alin Maun Claritiano), sira ne’e hotu hanesan kongresista.

Observadór sira kompostu mós husi, Pe. Aderito Morreira (Prezidente FOCADIMA), Pe. Flugêncio Gomes Dos Reis (Diretór COJUCDBA – Comisão Juventude Católica Diocese Baucau ) no Sra. Maria Dadi Magno (Prezidente CNJTL) sra. Jessica Kawengian (CNJCTL), Zulmiro Sousa membro MJS (CNJCTL), Eduardo Da Silva (CNJCTL) Sr. Manecas (CNJTL) . Streering commite mak Sr. Sabino De Araújo, Foin-sa’e Ricardo Da Costa Belo (CNJCTL), Evangelina Araújo Carloos (CNJCTL), Me. Júlia Marçal, FMA, Me. Tomásia De Deus, FDCC no Pe. João Soares (prezidente DEJUCDDIL), Br. Nico Lay (Vice Prezidente)

Programa no Atividade durante loron ha’at mak tuir ne’e:

Iha loron dahuluk 10 Outubru hahú ho Missa Abertura: Prezide husi Pe. Ángelo Salsina (Prezidente Sesante DEJUCDDIL nian. Iha ninia refleksaun konvida Joven sira atu hatene sira nia motivasaun loloos nudar Kristu nia apóstolu katak Joven mai ba Jezús, Joven tenki iha konviksaun no komitmentu hodi sai solusaun ba problema sira, Joven tenki hatene realidade no hateke ba realidade moris, Simu obstäkulu sira hanesan dezafiu atu muda moris, labele suspira ba moris, basa ne’e lafolin buat ida.

Iha loron ba daruak 11 Outubru, ami hahú Abertura Kongresu ho diskursu sira. Tuir mai Asembleia hahú kedas halo apresiasaun ba draft ne’ebé nia konteúdu konaba revizaun ba estatutu COJUCAD nian, prepara husi steering committee sira, husi Kapítulu I to’o Kapítulu VII, husi kogresista no observadór sira sira. Iha kalan ami mós reza hamutuk orasaun Taize iha ne’ebé ami ida-idak halo esperiénsia hasoru malu nian ho Jezús ne’ebè hadomi ami no bolu ami sai Joven apóstolu ba Joven.

Iha loron ba datoluk 12 Outubru, servisu kontinuasaun halo apresizsaun ba draft, husi kapitulu VII to’o X, apresiasaun ba draft remata no hetan solusaun di’ak ho kontribuisaun ideia husi kogresista no observadór sira.

Pe. João Soares, lee sai acta hodi taka kongresu no aprezenta mós estrutura ne’ebé hetan nomeasaun husi diretór Comisão Juventude Católica Arquidiocese Dili ( COJUCAD) rasik, no mós membru ativu hamutuk na’in 7 reprezenta vigararia hitu, entre Estrutura sira ne’e iha mós Foin-sa’e na’in rua husi Movimentu Juvenil Salesiano ne’ebé hetan konfiansa husi Padre Diretór hodi hala’o servisu iha COJUCAD mak hanesan: Vicente Cárceres Da Costa “Finno” no Natalia Oliveira “Amita”).

Missa Enseramentu: Prezide husi Arcebispo, Dom Virgílio Do Carmo Da Silva, SDB. Iha omilia Amu Bispu dezafia Foin-sa’e sira atu sai ba periferia atu fó sasin kona-ba Foin-sa’e sira nia fiar, tenki sai masin, la’ós sai ai-manas, tenki sai Foin-sa’e ne’ebé fó sabór ba ema seluk liu liu ba maluk Foin-sa’e sira seluk. Amu insiste maka’as atu formasaun integral ba Foin-sa’e sira no husu atu Parókia sira hamoris grupu FOSCA. Kongresu ida ne’e labele sai de’it hanesan dokumentus hodi tau iha biblioteka, maibé tenki iha planu estratéjiku hodi hala’o servisu sira hodi tun ba baze.

Iha loron ba daha’at dia 13 Outubru, Ami Estrutura foun sira tur hodi rona preokupasaun sira husi FOSCA kada vigararia. Preokupasaun sira husi FOSCA iha baze barak mak hateten katak sira menus formasaun integral, Parókia sira maioria la iha estrutura FOSCA nian, no adultu sira ne’ebè iha Parókia mós presiza hetan formasaun kona ba Pastoral Foin-sa’e nian, tamba wainhira joven hakbesik an ba parókia la hetan atendimentu ne’ebè diak, sira la sente uma no la hetan espasu ne’ebé tulun sira atu fó an. Tan ne’e Foin-sa’e barak husu ba membru estrutura foun atu tun ba sira nia Parókia hodi bele tulun sira iha parte formasaun integrál. Iha kongresu ne’e informa mós ba grupu movimentu sira ne’ebè hamahan an iha Kongregasaun Relijiozu/a sira atu haburas liu tan sira nia sentidu hola parte ba Kreda lokal no bele mós realiza sira nia atividade iha Parókia sira.

Mensajen ikus husi komisaun oragnizadora:

1. Diretor Executivo COJUCAD, Hatan ba preokusaun Jovem sira nian hodi husu ba Foin-sa’e sira hotu atu loron hirak ne’e ita hare ba “Formasaun La’os informasaun, maibé transformasaun”
2. Komisaun organizadora hakarak tebes agradese ba me. Madre provincial Salesiana no madre boot Canossiana nian ne’ebé Hadomi Foin-sa’e sira hodi marka presenza no partisipa másimu iha congresso refere liu husi Me. Júlia Marçal, FMA no Me. Tomásia De Deus, FDCC nian, Pe. Graciano Santos Barros ne’ebé tulun tebes, hamutuk ho ekipa hodi re-vê ba estatuto, no ba parte hotu ne’ebé tulun ona ekipa.
3. Mensajen husi estrutura foun ba Belun Foin-sa’e sira ne’ebé hola parte iha Parókia, Vigararia no Grupu movimentu sira, ne’ebé hamahan an iha Arquidiocese Dili, husu hakbesik an ba ita boot sira nia Parókia no movimentu hodi hetan informasaun no formasaun husi Foin-sa’e hirak ne’ebé partisipa ona iha congresso DEJUCDDIL Da-IV 2021.
4. Oras ne’e dadaun DEJUCDDIL transforma ona ba COJUCAD liu husi Cogresso, la haluha ami agradese ba Pe. Angelo S, Madre Lucia Pereira, FMA no me. Angelita Gomes, FMA ne’ebé ho sira nia dedikasaun tulun ona formasaun no atividade oratóriu iha DEJUCDDIL.

Belun Sira halo no hala’o buat ne’ebé ita bele, buat seluk Maromak sei halo kompleta. Hatan ba Missão hanesan ita Na’in Feto “Na’i nia atan oan mak ne’e halo tuir ita liafuan ba” (Luc, 1:38)

Belun Foin-sa’e sira “Lalenok mai ita nia personalidade no save ba ita nia susesu, loron aban hahú ohin mai aprende kedas hahú agora”. Pro Ecclesia Et Patria (Servi ba Kreda no Nação)

Alexandrina M. Da S. Soares (Chefe Comissão Organizadora ba Congresso) – Vicente Cárceres Da Costa (membru MJS)