Dili – Loron 17/7/22, ho ksolok boot ohin Komunidade Balide hamutuk ho ADMA, família sira, animadór no oratoriano sira halo peregrinasaun husi Komunidade Balide ba Lecidere hodi prepara ba selebrasaun festa aniversáriu tinan 150 Fundasaun Institutu nian.

Iha peregrinasaun ne’e ami fahe ba grupu neen husi Komunidade Balide. Grupu ida Antigas alunas sira husi Komoro. Grupu ida seluk fali husi Bekora, hamutuk grupu 8… hotu dirije no la’o hodi halo peregrinasaun ba Lesidere monumentu Nain Feto nian.

Kada grupu reza orasaun ne’ebé Inspetoria prepara ona. To’o iha Lesidere ami remata ami nia peregrinasaun hodi simu Bensaun iha monumetu Nain Feto nian husi Padre Paulus.

Hafoin ami kumprimenta Amu Paulus ho dansa 150 anos nian. Tuir tan Amu Bispu konvida ami ba iha Nia fatin hodi komprimenta nia no simu Bensaun dala ida tan husi Amu Arsebispu. Hafoin Amu Bispu Dioseze Dili nian fó parabens ba ita FMA sira ne’ebé tinan ida ne’e selebra tinan 150 Fundasaun Institutu nian, Bispu fó parabens espesial ba FMA sira iha Arkidioseze Dili nian, ne’ebé servisu maka’as ba salvasaun Klamar sira nian. Amu Bispu mós enkoraja oratorianu sira atu mai nafatin oratóriu hodi dehan: imi ba nafatin oratóriu, iha Oratóriu buat ne’ebé imi la aprende iha Eskola imi sei aprende iha ne’ebá.

(Honoria FMA)