Venilale – 7 Outubru 2021. Ho ksolok ami komunidade Madre Mazzarello Venilale hamutuk ho família irmán na’in rua nian hasa’e misa agradesimentu ba tinan 25 konsagrasaun Relijioza Ir. Carolina Correia FMA no Ir. Lucia Pereira FMA ne’ebé selebra tiha ona iha loron 6 Agostu liu ba iha Dili- Comoro hamutuk ho irmán na’in tolu seluk. Iha misa agradesimentu Jubileu Prata irmán na’in rua ne’e, sarani Venilale haksolok  tebes tan reprezentante Amu Papa Francisco nian iha Timor Leste, Pro- Nuncio Apostóliku Mons. Don Marco Sprizzi mai vizita Venilale no halo mós tinan moris nian iha loron ne’e . Nune’e, autoridade postu administrativu venilale ho autoridade lokal simu Pro Nuncio ho kultura.

Misa agradesimentu ne’e realiza iha Parokia Sagrado Coração de Jesus Venilale ne’ebé prezide husi Mons. Don Marco Sprizzi ho Na’ilulik na’in 15. Iha omilia Monsenhor hateten katak; memoria nossa Senhora Rozariu ne’ebé ohin ita selebra hanorin mai ita atu nafatin halo orasaun Rozariu furak ne’e, iha uma nu’udar Katólika. Ho festa ohin nian mós ita aprende husi Na’in Feto virtude perseveransa nian. Ida ne’e mak Ir. Carolina no Ir. Lucia selebra ohin, persevera to’o tinan 25 iha konsagrasaun  vida relijioza Salesiana. Perseveransa signifika fiel to’o rohan. Maria simu anunsiasaun husi Anju katak atu sai Jezús nia Inan, Maria nakonu ho dúvida maske nune’e Maria hatán SIN ba Na’I. Ha’u mak ne’e halo tuir Ita Liafuan ba. Ho maneira hanesan Ir. Carolina no Ir. Lucia hatan ba Na’i nia bolu iha tinan 25 liu ba nakonu ho entusiasmu. Nune’e mós kaben-nain sira halo sira-nia promesa ba malu no ita ne’ebé halo primeira komunaun, hotu hotu hatán ho entusiasmu. Na’ilulik sira hatán ita nia SIN banhira ordena ba Na’ilulik. Maibé liu tiha ida ne’e, la’ós buat hotu hotu fasil no buat hotu ita hatene bainhira mosu difikuldade. Liutiha anunsiasaun Anju nian Maria hasoru difikuldade hahu husi kous Jezús, tan la koñese mane maibé kous tiha ona to’o José mós hakarak husik nia. Maske nune’e Maria persevera nafatin no laran metin nafatin iha Maromak. Nune’e mós momentu aprezentasaun Jezús iha templu, Simeaun profetiza katak surik ida sei sona borus Maria nia fuan, maske nune’e Maria persevera nafatin. Hanesan ne’e mós bainhira Jezús lakon iha Jerusalem no hetan fali liu loron tolu Maria la komprende maibé rai buat hotu, perseveransa. Bainhira  Jezús halo tinan 30 hahu moris públiku hodi haklaken Evanjellu, hahu hamosu odiu no konflitu husi doutor lei nian no Farizeu sira hasoru Jezús hakarak oho Nia. Husi parte família hakarak konvensida Jezús fila ba uma, maibé Jezús hatán Ninia misaun mak halo tuir Aman nia hakarak. Maria rai buat hotu iha nia fuan laran perseveransa no kontinua laran metin iha Maromak no iha nia Oan Jezús. Bainira Jezús prega iha kruz no hetan torturasaun; Inan ida nia terus haree nia oan terus  maka’as liufali ida ne’ebé simu torturasaun ne’e. Maibé Maria nafatin iha kruz okos to’o rohan. Liu tiha tinan 33 bainhira Maria hatán Sin ba Na’i, ho disponibilidade hanesan Maria hatán ; Ha’u mak ne’e Na’i, halo tuir Ita Liafuan ba!. Nune’e mós bainhira hakoi Jezús, Maria kontinua persevera iha orasaun no fe to’o hetan ksolok iha nia Oan nia Moris Hias . Ho ksolok simu Espíritu Santu ho Apostólu sira Iha Pentekoste no ho ksolok akompaña kreda ne’ebé foin moris no ikus liu hetan ksolok tan sae ba lalehan ho isin no klamar hamutuk ho nia Oan  persevere nafatin harohan mai ita ne’ebe sei lao iha mundu ne’e. Tan ne’e maun-alin sira la’ós fasil koalia konaba perseveransa iha Maria nia moris. Tan nia ema bainbain hanesan ita, kriatura ida no feto ida; maibé sai modelu ba ita konaba perseveransa iha ita-nia fiar, ita-nia laran metin iha ita-nia dalan nu’udar kristaun Katólika. Ita harohan ba Maromak atu haraik mai ita grasa perseveransa nian nu’udar Na’i lulik, konsagrada, kaben nain no nu’udar kristaun katólika liu husi rozariu.

Iha momentu agradesimentu nian, Mons. nu’udar reprezentante Papa nian hato’o ba sarani sira katak, Amu Papa Francisco hakarak tebes vizita Timor Leste sei povu Timor simu ona vasina to’o 80%.

Depoizde Eukaristia santa, kontinua ho serimonia konfraternizasaun no divertimentu iha kolejiu Madre Mazzarello liu husi knananuk vokasaun nian, aniversariu nian dansa kultura.

(Alice Filipe FMA)