Cailaco – Ohin dia 7 Outubro Kreda universal selebra memória Nossa Senhora do Rosario nian. Iha kapela Estasaun Missionaria Cailaco loron nee sai espesial tan Nain Feto Rosario mak sai nu’udar mahein. Nune’e iha selebrasaun furak ida ne’e labarik 70 simu sakramentu Batizmu no labarik –adolescensia 57 simu Jesus ba dahuluk . Molok too selebrasaun furak ida neesarani sira hakbesik an ba sakramentu Rekonsiliasaun, Velada ba Nain Feto no ir. Virgilia fo formasaun ba labarik sira ne’ebe atu halo primeira komuñaun nia aman-inan sira no katekumenu sira nia aman-inan no aman-inan sarani. Formasaun ba familia sira nee koalia kona ba “papel aman-inan no aman-inan sarani nian iha akompañamentu ba oan sira nia baburas spiritual”. Durante formasaun ir. Virgilia mos enkoraja sira atu uluknanain sai modelu ba oan sira iha moris fiar nian , hanorin oan sira atu hadomi Maromak no kuda devosaun ba Nain Feto tan familia mak nuudar kreda basika, ne’e duni bainhira familia abut metin iha fiar kreda sei sai forte.

Molok selebrasaun Eukaristika kiik-oan sira simu uluk Batizmu hafoin kontinua ho misa. Durante umilia Pe. Filipe Moniz koalia kona ba Nain Feto nu’udar modelu no intersesora ba sarani sira liliu iha esperiensia funu Lepanto nian. Sarani no familia ne’ebe reza Rosario Nain Feto Proteje nia no sai inspiradora iha sira nia peregrinasaun iha mundu ne’e tan Nain Feto rasik koko ona moris ksolok no terus nian hahu husi Anunsiasaun too Kruz hun. Selebra Nain Feto nia festa husu mos ita atu banati tuir nia atitude sira haraik-an, fiar no fidelidade iha momentu hotu. Depoizde misa sarani hotu hamutuk selebra festa ne’e ho ksolok nu’udar familia ida.

Liurai Feto Rosario nian harohan mai ami.