Oikos de Deus = Uma Komun Maromak nian

(Season of Creation husi 1 de setembro – 4 de outubro 2021)

Dili – Ami grupu Jovem Volontariado Palomino Salesiana (JVPS) hamutuk ho Ir. Julia Marçal FMA, ho ksolok ami bele festeza Tempu Krisaun ne’e nian iha fulan Setembru ho eventu oin oin: uluk knanain, moris no fahe Maromak nia Lia Fuan hodi halo Lectio Divina iha kada Sabado fulan Setembru 2021 nian, tan ita hatene katak fulan Setembru mak fulan Bíblia nian. Ho nune’e ami buka haklean ami nia fiar hodi koñse no halo esperiénsia ho Jezús liu husi Sagrada Eskritura. Se ita la koñese Biblia katak la koñse Jezús (St. Jeronimo).

Momentu daruak, mak ami moris tuir Laudato Si. Ami simu konvite husi Parokia Maria Auxiliadora Komoro, atu anima liturgia Misa vespertina dia 25 Setembro. Maske la’ós ami-nia loron, maibé nu’udar joven ho ksolok ami hatán hodi hola parte ba Kreda no simu konfiansa ne’ebé Parokia fó mai ami. Ho tempu hanesan ami bele reza ho diak hodi hahi Maromak hamutuk ho povo tomak Maromak nian.

Momentu datoluk, mak realiza Peregrinasaun OIKOS iha Kristu rei iha 26 de Setembro. Oikos ho lian greguo katak ‘Uma’, familia. Amo Papa Fransisco hanaran ho lia fuan “Uma Komun” iha dokumento Ensiklika Laudato Si. Dimensaun espiritual Laudato Si ne’ebé ami realiza iha domingo ida ne’e mak hanaran Peregrinação tempo da criacão ida ne’e mak momentu espiritual ida ne’ebé hafoun ami nia relasaun ho ita nia Kriador no hatudu domin no respeta ba Kreasaun tomak ho intensaun atu fo hanoin fila fali kona ba ita ema nia responsabilidade ne’ebé Maromak entrega hahu kedas husi Maromak hahu Krea mundo no buat hotu (Jen 2,15). Peregrinasaun ida ne’e nakonu ho fuan gratidaun nian hodi hahi no Maromak hamutuk ho Ninia Kreasaun tomak ne’ebé fahe ba momentu 7 molok tamba ba tenda Abrão nian nebe simboliza nudar uma ne’ebé SIMU KREASAUN TOMAK. Peregrinasaun fiar nian ne’ebé anima mos ho reflesaun iha grupu ki’ik kona ba Leitura wainhira Maromak Krea mundo no buat hotu (Jen 1,1-31. 2.15). Agradese Maromak iha Kada momentu hodi hahi Maromak hamutuk ho ninia kreasaun hotu nebe mesak diak, kmanek no furak.

Ami nia peregrinasaun taka iha kalvariu iha Kristu Rei nia okos hodi apresenta reflesaun ba malu liu husi aktividade ho kreatividade juvenil: drama, kantu, puizia, no dansa no foti impenu konkretu ba moris. Ami nia peregrinasaun sai mos momentu haklean fiar nian maibe mos sai momentu atu hametin amizade no unidade grupo nian ne’ebè ami taka ho han meudia hamutuk hafoin jogos animados no haris tasi iha Dolok Oan.

Momento dahaat, iha dia 29 setembro, ami partisipa enkontro online Movimento Laudato Sí Katolika Asia no Oceania ne’ebé sai momentu formasaun ne’ebé riku tebes ho inisiativa no kreativadade oin-oin ne’ebé Nasaun ida diak apresenta sira nia projetu konkretu kona ba Laudato Si hodi proteje no haburas domin ba Uma Komún. Iha mos raprezentate husi Timor ne’ebé apresenta kona ba realidade Timor nian, liu liu banhira koalia kona ba soe foer arbiru, halo uma iha baleta no mota ninin, tesi ai arbiru iha ne’ebé provoka inundasaun no perigu oin-oin ba vida umana no natureza. Enkontru ne’e fó hanoin mos kona ba parte kultural timor nian atu tane as kultura tara bandu nian, se ema ida tesi ai atu halo uma, tenki kuda fali ai oan, nune’e ema hotu hatene respeita no hadomi natureza.

Obrigada barak ba esperiensia úniku no furak ne’ebé halo ami sai maun alin atu fo sasin kona ba ami nia fiar no sente responsabilidade atu hadomi, tau matan no proteje ita nia OIKOS (Uma Komun).

(Grupo JVPS; Agostinho no Vitoria Belo)