Cailaco (TL) – Atu remata fulan Bíblia no selebra loron padroeira  nian iha loron 7 Outubru, Komunidade Madre Romero (Cailaco), prepara labarik no adolexente sira liuliu sira ne’ebe analfabetu ba Primeira Komuñaun no konkursu Bíblia ba oratorianu sira. Sira hotu partisipa ho entuziasmu iha atividade sira ne’e.

Iha 1 Outubru, loron dahuluk fulan nian, komunidade hamutuk ho sarani sira partisipa selebrasaun Eukarístika hahú fulan Rozáriu nian. Molok hahú misa sarani husi bairru ida-idak halo prosisaun ho ida-idak nia ilas Na’i-Feto nian akompaña ho reza Rozáriu to’o iha kapela.

Depoizde misa bairu ida-idak prosisaun ho ilas Na’i Feto nian hodi lori ba família ne’ebé mak sira hili ona. Durante selebrasaun Padre Agapito, SDB konvida sarani sira atu hamoris fali tradisaun uluk nian halo “florinhas” ba Na’i-Feto no liuliu la’ós de’it lori aifunan maibé buka halo hahalok di’ak nu’udar ‘florinha’ ba Na’i-Feto, fó tempu atu reza rozáriu hamutuk ho família no haboot devosaun ba Maria. Maski sarani sira uituan de’it mak partisipa maibé sira reza no hananu ho ksolok.

Na’i-Feto Rozáriu nian harohan mai ami.

(Komunidade Madre Maria Romero-Cailaco)