Iha loron 11-12 Setembru 2021, Asosiasaun  Devotu Maria Auxiliadora (ADMA) realiza kongresu daruak ho online iha nivel rejiaun Ázia Leste-Oseania ho nia partisipante sira husi nasaun 15 ( Filipina Norte, Filipina South, China- Hong kong, Tawan no Macau, Vietnam, Thailand, Indonezia, Korea Sul, Timor-Leste, Japaun, Papua Nova Guinea + Solomon Islands, Australia Pasifik – Samoa, Fiji, Nova Zelandia. Myanmar, Pakistan no Kamboja.  Iha kongresu ne’e Timor-Leste mak sai uma-na’in maibé tanba ho situasaun pandemia ida ne’e mak diriji husi Filipina ho lian Inglês no tradutor mai husi nasaun idak idak nian.

“ LIKE MARY WE WALK WITH JESUS – Hanesan Maria, Ita La’o ba Jezús” mak tema ba kongresu ida ne’e. Objetivu husi kongresu ida ne’e mak atu haklean iha membru ADMA identidade : Hanesan Maria, ita la’o ba Jezús. Kreximentu iha sinerjia tuir matadalan asosiasaun ADMA mondiál nian. ADMA sira bele fó inpirasaun ba malu liu husi esperiénsia karizmatíka ne’e rasik.

Iha loron dahuluk, Reitor Mor Don Ángel Fernández Artime SDB, fó lia menon ba membru ADMA iha rejiaun Ázia Leste- Oseania katak; “la bele komprende ita nia an nu’udar Kongregasaun Saleziana ida, nu’udar Salezianu Don Bosco no nu’udar familia Saleziana lahó sentralidade Maromak nian, evidentemente lahó Jezús no mós lahó Maria Sarani sira-nia Tulun. Família ida Don Bosco nian lahó Madonna, sei la sai família Don Bosco nian. Ha’u enkoraja imi atu selebra ho vizaun boot ida, ho maneira ida ho fiar boot, ho esperansa wa’in iha kongresu internasional ida ne’e ho lema ida ne’e, slogan ida ne’e; Hanesan Maria, ita la’o ba Jezús. Ida ne’e mak pontu sentral ita-nia moris. Nia akompaña ita. Nia ida-ne’ebé halo buat hotu ho Don Bosco, kontinua atu halo nune’e ho ita”

Hafoin iha kongresu ne’e mós koalia konaba ADMA nia knar no funsaun iha Kreda, Sosiedade no Familia Salesiana depois Buona notte husi Arcebispu Don Virgilio do Carmo da Silva, SDB. Iha loron daruak nian, koalia konaba ADMA nia knar iha familia hafoin Rozariu hamutuk no Buona notte husi padre Rejionál Ázia Leste – Oseania, Pe. Joseph Phuoc SDB. Iha buona notte ne’e Padre Joseph hateten katak; hanesan Kristaun sira hotu ita hadomi Maria hanesan Jezús hanorin ita: Ida ne’e mak Ha’u-nia Inan. No ita rona liafuan sira inan nian ne’ebé hanorin ita: imi halo tuir buat ne’ebé Nia dehan ba imi. Don Bosco nia devosaun ba Na’I Feto klean hanesan kualker mestre kristun sira. Don Bosco inkorpora devosaun ne’e ba dimesaun ida ninia misaun nian hodi serbi foin-sa’e sira. Nune’e  mós membru sira familia Saleziana nian, mak nia inkorpora ona devosaun ida ne’e ba ninia apostuladu pastoral edukasaun nian. Ikus liu fó bensaun Maria Auxiliadora nian.

(Alice Filipe FMA)