Roma – Iha 13 Setembru 2021, Kapitulár sira iha treinamentu kona-ba metodolojia plataforma telemátika, hanaran alfresco, ne’ebé sei uza durante servisu sira kapítulu nian no rona Madre Jerál Institutu ‘Figlie di Maria Ausiliatrice’, Ir Yvonne Reungoat nia liafuan sira, ne’ebé fó introdusaun ba Loron sira Orasaun nian husi loraik ne’e to’o loron 15 Setembru 2021.

Iha dadeer hahú ho selebrasaun eukarístika ne’ebé prezide husi padre Jesús Manuel García, SDB, kapelaun ‘Casa Generalizia’ nian, ne’ebé enkoraja atu moris atitude abertura no disponibilidade nian ba Espíritu Santu nia inspirasaun, ne’ebé gia atu buka dalan foun sira, atu Institutu hodi hala’o ho fidelidade karizmátika no audásia apostólika.

Molok  tama iha serbisu sira, iha orasaun ne’ebé foti inspirasaun husi Papa Francisco nia Mensajen ba Loron Mundiál Komunikasaun Sosiál 2021. Mensajen ne’e konvida atu rona realidade, lahó prekonseitu sira, konvida atu ba to’o periferia sira, atu hafoun hakaran atu kria komuñaun no fahe buat ne’ebé haree no rona ho esperansa iha Maromak ne;ebé bolu no haruka.

Dr. Nicola Bianconcini, Diretór no Jerente Kedos nian aprezenta metodolojia plataforma Alfresco. Plataforma dijitál ne’e fasilita serbisu kolaborasaun no sinerjia nian, ba elaborasaun dokumentu sira-nian.

Parte loraik, ho invokasaun ba Espíritu Santu, hahú tempu silénsiu no raronak Liafuan nian. Madre Jerál, Ir Yvonne Reungoat, husu partisipante sira atu moris iha profundidade tempu orasaun no silénsiu «iha raronak Espíritu nian, atitude indispensavel sira atu kria klima di’ak liu nune’e Kapítulu Jerál XXIV bele orienta an atu buka Institutu nia di’ak ho sinseru no paixaun, tuir Maromak nia projetu, atu hafoun fidelidade ba don karizmátiku ne’ebé Fundadór sira simu no tranzmite”.

Liafuan ne’ebé atu rona iha atitude silénsiu mak “Sira la iha ona tua” (Jo 2, 3), no Jezús ne’ebé hatán: “Ha’u nia oras seiduan to’o” (Jo 2,4).  Jezús nia oras iha Kan’a no ita-nian: «ita hahú moris oras ne’ebé Maromak marka husi eternidade ba akontesimentu grasa nian ida-ne’e iha Institutu nia moris. Ne’e duni, ita prepara an atu esperimenta nia nu’udar Kairós ida, iha raronak atenta no dosil ba buat hotu ne’ebé Espíritu hakarak sujere mai ita ba Irmán sira nia di’ak, foin-sa’e feto no mane sira ne’ebé konfia mai ita nia di’ak”.

Iha tuku 6.30 kalan, nu’udar komunidade orante, Kapitulár sira moris momentu intensu adorasaun eukarístika nian: ne’e mak oras grasa nian, iha Kaná no mai ita. Madre konvida atu reflete kona-ba Jezús no Maria nia esperiénsia: “mistériu ida atu kontempla no insentivu ida atu aplika iha moris loroloron”.

Tuirmai, iha klima silénsiu, iha selebrasaun Vésperas nian, Kapitulár sira hanoin hikasfali Madre Mazzarello nia espíritu dosil, haraik-an no nakloke, no husu atu ita pronta nafatin atu sevrí no rona Maromak iha diversidade ambiente no kontestu sira-nian iha-ne’ebé ida-idak moris misaun FMA nian iha tempu ohin, no hanoin hikas fali katak iha Kan’a, ema sira ne’ebé serví «la simu bolun atu nakfilak bee ba tua. Sira simu bolun atu enxe kusin sira to’o naksulin, atu tau iha tasa ida no fó ba ema ruma atu koko. Maromak mak halo buat sira seluk!»  (J Rogers).

Ne’e mak konvite atu loke fuan ba esperansa, sai servidór/a sira ba umanidade foun, nakloke ba Maromak nia planu salvasaun: «Ita husik Maria kaeer it aliman no lori ita iha-ne’ebé nia hatene bele hetan ‘tua di’ak’ festa nian».