Loron 5 Agostu 1872/2012: ita agradese ba tinan 140 serbisu ba no ho foin-sa’e sira; ita agradese ba foin-sa’e na’in rua nia laran-luak: ir Meira no ir Maria ba sira nia sín ba Maromak nia bolun.

 

Loron 5 Agostu maka loron importante ne’ebé halo ita hanoin fali Institutu ninia hahún no loron ne’ebé halo ita agradese ba Maromak, ba kmanek hotu ne’ebé Nia realiza iha FMA ida-idak nia moris durante tinan 140. Husi rai ki’ik ida ne’ebé do’ok husi mundu nia hanoin, moris no buras Institutu FMA  ho de’it irmán sanulu resin ida. Ohin loron iha Timór mós fini ki’ik ne’e hahú buras ba daudaun.

 

Iha loron espesiál  ne’e, ita agradese ba Nai tanba Nia bolu tan foin-sa’e nain rua, ir Meira no ir Maria atu kolabora iha Nia planu salvasaun nian. Hanesan S. Paulo ne’ebé dehan: Nai bolu imi atu sai hanesan Nia oan Jezús Kristu. Husi liafuan ne’e Amu-Bispu komenta katak ita hotu iha obrigasaun atu sai santu hanesan Jezús Kristu liuhusi dalan oin-oin iha ita-nia hanoin no komportamentu loroloron nian. Iha dalan Kaben nian no mós iha vida konsagrada. Iha vida konsagrada ne’e ita sai hanesan Jezús Kristu iha buat hotu-hotu maibé mós ho ita nia fíziku. Loos duni ita saran ba Maromak buat folin laek maibé se laiha ema ruma ne’ebé hakarak fó, se laiha ita ema nia kolaborasaun, Maromak labele halo buat di’ak ba ema seluk. Dala ruma bele mosu mós pergunta: tan sá sira ne’ebé konsagra-an husik sira nia konsagrasaun? Nu’udar ema dala barak ita la metin ba ita-nia kompromisu maibé iha Maromak nia futar oin ita-nia kompromisu nafatin iha valór. Tan ne’e presiza nafatin orasaun husi familia no komunidade sarani nian.

Selebrasaun ohin nian, la’ós de’it momentu atu agradese maibé mós momentu atu harohan husu grasa no momentu atu hafoun ita-nia sín ba Nai, nune’e bele sai profeta iha ita-nia tempu hanesan ita-nia irmán dahuluk sira. Ita tenke sai diferente, barani atu haklaken maski ema rona ka lae. Ita iha obrigasaun atu haklaken Jezús ne’ebé ita fiar.

Agradesimentu husi ir Meira no ir Maria:

 

“FMA mak monumentu agradesimentu Don Bosco nian ba Maria Ausiliadora, nune’e ami agradese tebes ba Institutu ne’ebé simu ami. Ami sei hakas-an atu sai tebes duni Maria nia oan sira hanesan Don Bosco nia mehi iha ami nia moris”.

Ami-nia parabéns no votus fidelidade nian, hamutuk ita kontinua hanaruk iha tempu Don Bosco no Madre Mazzarello nia mehi.