Setembru fulan Bíblia nian: Kreda konvida ita atu koñese di’ak liután Bíblia.

Setembru sai fulan Bíblia ho razaun tanba S. Jerónimo nia festa ne’ebé selebra iha loron 30.

S. Jerónimo moris entre tinan 340 no 420, nia mak sekretáriu Papa Damaso nian no hetan knaar atu haree filafali tradusaun latina Sagrada Eskritura nian. Versaun latina ne’ebé santu ne’e halo hanaran Vulgata, iha lia-latin signifika “populár” no ninia serbisu sai referénsia iha tradusaun Bíblia sira hotu to’o ita-nia tempu. S. Jerónimo tau Bíblia iha linguajen povu nian.

Bainhira selebra Fulan Bíblia nian, Kreda konvida ita atu hatene kle’an liután Maromak nia Liafuan, no hadomi ba beibeik no halo loroloron, meditasaun Liafuan nian no harohan ho Liafuan ne’e. Esensiál tebes ba dixípulu misionáriu ida iha kontaktu ho Maromak nia Liafuan atu sai metin iha Kristu no bele fó sasin kona-ba nia iha mundu ohin, ne’ebé presiza tebes ninia prezensa. “La hatene Eskritura katak la hatene Jezús Kristu” no renunsia atu haklaken Nia. Se ita hakarak sai dixípulu no misionáriu Jezús Kristu nian, presiza koñesimentu kle’an no moris tuir Maromak nia Liafuan. Presiza fundamenta ita-nia kompromisu misionáriu no ita-nia moris sarani tomak iha fatuk Maromak nia Liafuan nian.

Bíblia soi buat hotu ne’ebé Maromak hakarak komunika mai ita iha relasaun ba ita-nia salvasaun. Jezús mak sentru Sagrada Eskritura nian, Iha Jezús mak promesa sira iha Testamentu Tuan ba Maromak nia povu kumpre hotu.

Bainhira ita lee Bíblia, ita keta haluha katak Kristu mak Maromak nia revelasaun nia tutun. Nia mak Maromak nia Liafuan moris. Sagrada Eskritura nia liafuan hotu hetan ninia sentidu definitivu iha Nia, tanba iha mistériu Ninia Mate no Moris-Hi’as mak Aman Maromak nia planu ba ita-nia salvasaun kumpre tomak.

Ita hein katak inisiativa sira ne’ebé sei halo iha fulan Setembru, fulan Bíblia nian, tulun fuan sira ne’ebé kolen no hetan provasaun husi pandemia atu hetan hikas fiar no konsolasaun iha Na’i (kf Ez 37). Iha tinan dedika ba S. José, bele sai okaziaun ida atu imita Santu ne’e ninia fidelidade iha ninia tau-matan ba Maromak nia Liafuan ne’ebé enkarna an iha Virjen Maria nia knotak momoos no hakarak horik iha ita leet, atu partilla ita-nia terus, sofrimentu no susar sira, maibé mós atu haraik esperansa iha ita-nia luta no esforsu sira.