DILI- Husi 25-28 Agostu 2021 hamutuk ho Irmán Julia Fernandes Marçal FMA, ami, Irmán sira segundu novisiadu nian, reflete tema aliansa domin nian ne’ebé Maromak kontinua halo ho Nia povu no ho ita ida-idak too ohin loron. Uluknanai Maromak halo aliansa ho profeta sira : Abraun, Moises no profeta sira seluk tan. Maromak no Ninia povu empena-an  atu observa aliansa. Maromak empena –An hodi luta ho povu Israel sira, fó rai ba sira, akompaña sira too ba rai promesa. Husi parte povu nian empeña-an atu hadomi Maromak ho fuan tomak, fiél ba ukunfuan ne’ebé Maromak fó ba sira iha foho Sinai. Aliansa ne’e iha relasaun domin resíproka, tamba Maromak nia domin mak fiél nafatin, maibé povu Israel nia domin mak infiél. Ita hatene katak Maromak kria aliansa tan domin, iha ita nia loron Batizmu ita hahú aliansa domin nian ne’e entre Maromak ho ita ida-idak.

Jezús mak aliansa Maromak nian ne’ebé foun no rohan laek. Aliansa ne’ebé kontinua iha istoria, ita haree iha sinal Eukaristia nian. Bainhira ita simu Eukaristia, ita simu la’ós de’it Kristu nia isin Eukaristiku, maibé mós Kristu nia isin Místiku. Eukaristia  halo ita sai povu aliansa nian, no fó ba kreda kapasidade atu evanjeliza iha fatin hotu no iha tempu hotu. Maria mak arka aliansa foun tamba simu iha nia-an Jezús, simu iha nia isin liafuan moris, konteúdu tomak Maromak nia vontade, Maromak nia lia-loos no aliansa ne’ebé foun no definitivu.

Ita feto konsagrada hakat liu aliansa husi batizmu, maibé mós empeña-an hodi moris radikál liután, hodi fó tomak ba Maromak ita nia kapasidade atu hadomi no kapasidade atu regula ita nia moris. Artigu 9 konstitusaun FMA nian fó hanoin katak liu husi ita nia profisaun relijioza ita hatama-an iha aliansa ne’ebé Maromak halo ho Don Bosco no Madre Mazzarello. Aliansa ne’ebé FMA halo esperiénsia iha  relasaun karizmátika ne’ebé la bele haluha, Maromak liu husi Espíritu Santu fó ba Don Bosco no Madre Mazzarello prezente karizmátika ne’ebé entrega tutan mai ita. Dimensaun karizmátika ida ne’e mak importante ho ita nia estilu moris aliansa nu’uda FMA. Aliansa halo husi parte rua ne’ebé foti empeñu partikulár :

• Parte Maromak nian mak hili, bolu, no akompaña ita nia dalan sequela Christi hafoin Maromak empeña-an hodi haraik kmanek Espíritu Santu nian ne’ebé gia ita no hamanas ahi karizma nian iha ita nia laran
• Parte FMA nian mantein fiél ba karizma ne’ebé hatudu iha konstitusaun.

Ami hakle’an tópiku sira ne’e ho atividade oi-oin mak hanesan lectio, reflesaun pesoál, tersu, sharing,  no foti empeñu atu moris di’ak liután aliansa domin nian ho Maromak. ohin loron ikus ami taka ho selebrasaun ho tema Maria Arka Aliansa foun. Obrigada Madre Julia ba akompañamentu hotu.

(Ir Olviana, Ir Josefa, Ir Libanha FMA)