Papa S. Pio X, “ Papa Eukaristia nian” ho naran batizmu Giuseppe Melchiorre Sarto. Moris iha 2 Juñu 1835 iha rejiaun Riese Dioseze Treviso – Italia norte. Aman naran Giovanni Sarto no inan Margarida. Mai husi familia kiak, umilde no ho oan barak hamutuk na’in 12 no Giuseppe mak oan daruak. Maske nune’e familia ne’e riku iha fiar ba Jezús Kristu. Giuseppe sei kiik kedas hatudu intelijensia brilante no hakarak sai padre, tan ne’e nia familia buka dalan atu nia bele estudu. Bainhira prepara an atu ba semináriu aman mate, nune’e Giuseppe deside la kontinua estudu atu bele fó tulun ba familia. Maibé inan Margarida, feto korajoso no fiar na’in nafatin fó korajen.

Hafoin ho tinan 23 ordena ba Na’ilulik. Tan nia intelijensia, moris orasaun, haraik – an no nakonu ho karizma, hili nia sai vigáriu, kónegu ba katedral Treviso no sai Bispu ba Mántua. Tuir mai Papa hili nia sai kardeal Veneza nian. Tan Papa Leão XIII mate, iha konklave 1903, Don Giuseppe Melchiorre Sarto eleitu sai Papa no hili naran Pio X no ho lema : “Restaurar as coisas em Cristo – Hafoun buat hotu iha Kristu”. Lema ida ne’e nu’udar vijilante atensaun ba moris interior Igreja nian. Nune’e Papa Pio X promove renovasaun iha Igreja, hodi taumatan ba Biblioteka, reforma Semináriu sira no hafoun múzika sakra. Iha nia ukun mak kria breviáriu, livru orasaun ne’ebé klerigu sira utiliza atu reza durante tinan tomak.

Papa Pio X, iha devosaun boot Eukaristia. Papa afirma katak; sentru moris kristaun nian mak Eukaristia, asegura ba moris rohan laek nian no bele kombate inimigu sira. Fiar na’in sira sei hetan grasa wain bainhira simu Kristu Futar Isin loron loron. Nia autoriza atu labarik sira ne’ebé iha tinan hitu ba leten, ne’ebé hatene ona distingi paun bainbain ho Paun Kristu Futar Isin, bele ona simu Kristu nia Futar Isin no Ran. Iha ninia governu mak hanorin katesismu iha parokia sira, atu fiar na’in sira hotu hatene di’ak liu fiar ne’ebé sira profesa.

Mate iha 20 Agostu 1914 ho tinan hitunulu resin sia. Beatifika iha 1951 no kanoniza iha 3 Setembru 1954 husi Papa Pio XII. Kreda selebra iha 21 Agostu.