20 Agostu

S. Bernardo de Calaraval

S. Bernardo moris iha 1090, iha Kastelu Fontaine, rejiaun Borgonha, Fransa nian. Nia mak oan husi datuk/nobre ida naran Tescelin Sorrelno husi Aleth de Monthbard, feto virtude nian no venera nu’udar rahun-di’ak. Bernardo iha maun alin hitu no nia mak oan datoluk. Bernardo iha intelijénsia maka’as no beleza fízika. Ho tinan 9 nia ba iha eskola kanónika, no iha kapasidade boot iha literatura.

S. Bernardo nia vokasaun 

Iha 1112, ho tinan 22 anos, Bernardo tama iha Abadia Cister nian, iha Borgonha. Abadia ne’e mak mosteiru ‘cisterciense’ ida ne’ebé  S. Roberto de Molesme mak funda.

Nune’e mak Bernardo konvense ema liu tolunulu, ninia maun-alin, tiu no belun sira atu tama iha orden, hodi hamosu surpreza no ksolok ba Abadia no ba Santu Estevão Harding, abade susesór ba fundadór S. Roberto.

Bernardo mak mane ida estudu no orasaun nian, hodi pratika ho austeridade regra mosteiru nian, ne’ebé S. Bento mak hakerek. Bernardo dedika an ba orasaun no katekeze. Nia iha don atu halo diskursu/oratória no konverte ema barak ne’ebé ko’alia ho nia, to’o nia lori ba konventu nia alin ikun no nia aman.

Liutiha tinan rua iha Cister, Bernardo simu knaar atu bá iha Langres iha 1115, ho misaun atu funda Abadia Claraval nian, (rai-klean klaru), hodi sai Abade dahuluk, ho tinan 25 de’it. Iha tempu badak Fransa tomak koñese Abadia no hafoin Europa tomak, nu’udar fatin ida iha-ne’ebé moris orasaun, serbisu, karidade no kultura kle’an.

Bernardo no monje sira Claraval nian moris ho domin no integridade votu sira pobreza, kastidade no obediénsia nian. Dala ida Bernardo iha vizaun ida: labarik oan ida ho roman divina dehan ba nia: ó ko’alia nafatin ba ema seluk, basá Espíritu Santu sei inspira nafatin  no ó sei simu grasa espesiál atu komprende ema sira nia frakeza no tulun sira. Nune’e, Bernardo konsege vokasaun barak ba Claraval. Mosteiru Claraval to’o hetan monje 700, inkluzive Henrique Fransa nian, Liurai Luís Vll nia alin, ne’ebé ikusmai sai bispu no arsebispu Reims nian.

S. Bernardo nia obra sira

Ho tinan sira ne’ebé liu, S. Bernardo funda uma 72 orden Cisterciense sira-nian iha Fransa no iha país oioin Europa nian. Nia partisipa iha Konsíliu Laterano nian, nu’udar sekretáriu. Nia mós partispa iha Konsíliu Troyes nian, iha-ne’ebé nia ezerse influénsia boot, no Konsíliu Reims nian, nafatin obedese ba Amu-Papa nia pedidu, atu trata asuntu sira Kreda nian.

Hodi Papa nia konvite, nia prega kruzada daruak. Nia sai koñesidu nu’udar sarani sira nia Aman, Koluna Kreda nian, Apoiu Santa Sé nian, Anju Tutelár Maromak nia Povu nian.

Ninia devosaun ba Virjen Maria la iha ida mak bele tanesan. Bainhira nia iha Alemaña, iha katedrál Spira nian, nia hakneak dala tolu hodi dehan: “Ó Clemente; Ó Piedosa; Ó Doce Virgem Maria!”, invokasaun sira ne’ebé aumenta iha orasaun “Salve Rainha” nia rohan.

Tanba nia fama santidade no sabedouria nian, S. Bernardo sai personalidade importante ida no Europa tomak respeita. Nune’e mak nia intervein iha asuntu públiku sira, defende Kreda nia dieitu kontra Liurai sira nia abuzu sira no Amu-Papa no Liurai sira bolu nia atu husu konsellu.

S.Bernardo reforma Orden Cistercienseno hodi sai buat ne’ebé ohin loron mós sira sei moris tuir. Nia rasik harii mosteiru barak uha Europa: 35 iha Fransa, 14 iha España no Irlanda, 6 iha Flandres, 4 iha Itália, 4 iha Dinamarca, 2 iha Suécia no 1 iha Hungria, aleinde seluktan ne’ebé afilia ba Orden, Nia Orden to’o iha kontinente lima.

S.Bernardo hakerek obra boboot, tratadu sira teolojia nian, obra sira atu defende Fiar Katólika kontra erejia sira, aleinde tratadu barak kona-ba Na’i-Feto.

Mate

Bainhira nia atu mate no monje sira harohan ba Maromak atu nia keta husik sira, Bernardo dehan: “Tanba sá imi hakarak mantein ema ida mizerável nune’e? Imi iha mizerikórdia mai ha’u no husik ha’u bá Maromak”. Nune’e, S. Bernardo mate iha 20 Agostu 1153, ho idade 63.

Papa Alexandre III kanoniza S. Bernardo iha 18 Juñu 1174 no Papa Pio VIII deklara nia Doutór Kreda nian iha 1830, tanba ninia pregasaun np obra sira nia hakerek. S. Bernardo nia festa komemora iha 20 Agostu.