17 Agostu

Santa Beatriz

(Memória obrigatória iha Portugal)

Beatriz moris iha séklu XV iha Ceuta, iha norte Áfrika nian, sidade ne’ebé, iha époka ne’e, iha koroa Portugal nia ukun. Nune’e, nia moris nu’udar portugeza. Nia aman governadór Ceuta nian. Sei ki’ik-oan, nia muda ba Portugal ho nia família, ne’ebé kuda iha menina ne’e devosaun kle’an ba Na’i-Feto Konseisaun nian. Ho tinan 20, sira haruka nia ba España nu’udar dama onra nian ba D. Isabel, D. João I nia bei-oan, ne’ebé sai liurai D. João II Castela nian, nia espoza, no iha-ne’e mak hahú ninia kalváriu.

Beatriz bonita liu, no liurai-feto, tanba iha siúmes no inveja, taka nia iha kofre ida ba loron barak, atu nia labele dada iis no mate, maibé Virjen Maria nia protesaun ivizivel, salva Beatriz.

Nu’udar jestu konkretu agradesimentu nian, Santa Beatriz aseita ninia vokasaun ba vida relijioza, no tuirmai nia bá Toledo, iha-ne’ebé nia haksumik an iha mosteiru Dominicana sira-nian (sanak femininu Orden S. Domingos de Guzman nian), iha-ne’ebé nia moris ba tinan tolunulu.

Maibé Maromak hili Beatriz ba obra boot liután: funda Orden ne’ebé klauzura rigoroza iha moris kontemplativa no orasaun nian, peniténsia no serbisu nian.

Santa Beatriz da Silva husik mosteiru dominikanu no ba hela iha sede foun ne’ebé sai knuuk ba monja “concepcionista” sira. Orden ne’e karakteriza ho liman-rohan espirituál tolu: domin ba Maria Imakulada, ba Jezús Kristu nia paixaun no ba Santíssima Eukaristia.

Santa Beatriz mate iha 9 Agostu 1490 ho tinan 66. Iha momentu nia mate nian, ema haree naroman boot ida nakfilak nia oin no fitun ida nabilan iha nia ulun to’o nia iis kotu.

Papa Pio XI beatifika nia iha 1926 XI, no ninia iha 1976 Papa S. Paulo VI kanoniza nia.