Dili– hahu loron 11-14 agosto 2021, ami hakle’an kona-ba pastorál. Hahu ho lectio salmo 22, kona-ba Jezús Bibi-Atan Di’ak,  no kada loron nafatin iha lectio ho tema oi-oin ne’ebé gia ami. Don Bosco gosta Bibi-Atan Di’ak nu’udar modelu ba ninia karidade no nia propoin ilas Bibi-Atan Di’ak nian ba sira hotu ne’ebé hakarak eduka labarik no foin-sa’e sira. Atu bele sai Bibi-Atan Di’ak, ita rasik presiza konxiente katak Jezús mak Bibi-Atan Di’ak ba ita, Nia sei la husik ita iha difikuldade laran.

Durante loron hirak ne ‘e ami hakle’an tema sira ne’ebé tulun ami atu hafoun, hamanas, no hakle’an liu tan servisu pastorál nian. Tema sira mak :

1. Domin espesiál ba foin-sa’e sira. Bainhira ita dehan katak foin-sa’e sira mak ita nia “rai santa” ita hakarak asume buat ne’ebé Maria entrega ba Joãozinho iha mehi tinan 9 nian, Maria mós entrga foin-sa’e feto sira ba Maria Mazzarello ho liafuan “Hau entrega sira ba ó”.
2. Formasaun ba pastorál : Saleziana ida presiza sente “domin preferensiál” ba foin sa’e sira no sente sira nu’udar Maromak nia prezente espesiál ( kons. 65 ). No ita presiza forma ita nia fuan tuir Don Bosco nia fuan : “hamutuk ho imi hau sente di’ak”.
3. Sistema domin edukativu ohin loron tuir Amu Papa Francisco nia liafuan sira atu eduka foin-sa’e sira presiza “eduka fuan, eduka hanoin, eduka ba asaun solidária”.
4. Asistensia salesiana :  nu’udar FMA, ita simu bolu atu sai “asistente sira”, atu “presente iha foin-sa’e sira leet” durante ita nia moris tomak. Ida ne’e de’it mak dalan los atu moris nu’udar salesiana.
5. Dimensaun Misionária :  Ita labele komprende FMA nia identidade se la iha misaun. Dimensaun misionária mak elementu esensiál identidade Institutu nian. Hanesan papa Francisco nia liafuan “hau mak misaun ida iha rai ne’e, no tanba ne’e hau hela iha mundu ne’e”.
6. Katekeze : mak dimensaun Evanjelizadora nia aspetu espesífiku iha ita nia pastorál juvenil. Katekeze laos de’it preparasaun ba sakramentu sira ka transmisaun regra ruma, maibé prosesu atu eduka ba moris sarani no relasaun ho Maromak.
7. Animasaun Vokasionál : se laiha fekundidade vokasionál ita tenke duvida kona-ba ita nia pastorál. “ita bele koalia kona-ba vokasuan ba foin-sa’e feto no mane sira se ita mós haksolok ho ita nia vokasaun, se iha orasaun no ho kbiit Espíritu Santu ita halakan nafatin ahi sim dahuluk nian maski iha kolen no todan iha moris lor-loron”

Ohin remata ho lectio kona-ba liafuan xave sira ba komunidade ida ne’ebé eduka. Liafuan sira ne’e mak  “hamutuk, diálogu, kolaborasaun, korresponsabilidade no buras”. Remata loron hodi halo selebrasaun ba kada tema no halo empeñu sira atu bele pratika iha moris.

Ami agradese barak ba madre Alma, ne’ebé prepara materiál  furak no kle’an kona-ba pastorál ne’ebé tulun ami atu avalia fali pastorál ne’ebé ami hala’o. No mós  agradese ba madre Julia ne’ebé hola Me. Alma nia fatin atu akompaña ami durante loron hirak ne’e.

(Irmán Libanha, Ir Olviana, Ir Josefa)