Venilale – Ohin 7 Agostu, ho fuan ksolok no nakonu ho gratidaun komunidade Mazzarello inklui mestre/a no estudante Eskola Tékniku Vokasionál Venilale, simu Ministru Turismo, Comércio e Industria, Ex.mo Sr. José Lucas do Carmo da Silva, ho ninia komitiva tomak.

Iha sorumutuk ne’e, Senhor Ministru fó lia menon ba estudante sira hodi dehan : “ ita boot sira mak iha papel importante tebes iha prosesu dezenvolvimentu ida ne’e, ita boot sira mak sei transforma Timor ne’e, halo mudansa no transforma komunidade ne’e tuir demanda era globalizasaun ninian, maibé se ita boot sira prepara an didiak agora. Durante hela iha Venilale uza tempu didi’ak, uza minutu no segundu. Presiza responsavel ba tempu ne’ebé imi nia inan aman fó ba imi durante hela iha Venilale ne’e. Ita boot sira-nia eskola iha ne’e la hanesan iha eskola sira seluk, iha ne’e iha prátika barak tan ne’e aprende didiak ba. Nune’e kuandu sai husi fatin ne’e, sei util tebes sei dezenvolve duni ita boot sira-nia komunidade, sai ajentes transformadora iha imi nia suku. Dezenvolvimentu sei la mai hanesan ne’e deit, bainhira juventude sira la haka’as an la responsavel iha tempu prepara sira-nia an”.

Hafoin Senhor Ministru husu mós ba mestre/a, no estudante sira atu serbisu hamutuk kombate Covid-19, hodi tuir didi’ak protokolu saude nian no hotu hotu iha responsavel atu ba vasina. Tan ho vasina ne’e mak ita bele proteje ita nia an, ita-nia familia no ita-nia nasaun.

Senhor Ministru hatutan liután katak; Ministeriu Turismo Comercio no Industria nakloke ba eskola ida ne’e, tan eskola ida ne’e iha relasaun ho Ministériu ne’e, liuliu iha parte hotelaria, hospitalidade, prepara ema oinsa simu turista, oinsa simu ema, trata ema no koalia ba ema iha fatin entrada turismu ninian. Basa hospitalidade ne’e sai fatór importante iha turismu. Nune’e mós area kulinária ne’ebé tama iha parte industria ninian, husu atu aprende didi’ak. Ministeriu ne’e nakloke ba eskola ida ne’e nia presiza. Nune’e bele serbisu hamutuk hodi prepara di’ak liutan ita-nia juventude sira ba ita-nia dezenvolvimentu nasionál.

Hafoin, ami agradese tebes ba Senhor Ministru nia prezensa no nia apoia humanitarian ho fos 150 saka ba ami-nia komunidade no eskola. Ho ne’e ami agradese ho knananuk no dansa agradesimentu nian.