Maun no biin-alin sira, bondia!

Iha Evanjellu Liturjia ohin nian, Jezús kontinua haklaken ba ema sira ne’ebé haree milagre multiplikasaun paun nian, No konvida ema sira-ne’e atu halo haksoit ida kualidade nian: depoizde fó hanoin kona-ba maná, ne’ebé Maromak hodi halakon sira aman sira nia hamlaha durante dalan liuhusi dezertu, oras ne’e nia aplika símbolu paun nian ba an rasik. Nia dehan momoos: «Ha’u mak paun moris nian» (Jo 6,48).

Sá loos signifikadu paun moris nian? Atu moris presiza paun. Ema ne’ebé hamlaha la husu ai-han didi’ak no karu nian, husu mak paun. Ema ne’ebé la iha serbisu la husu saláriu boboot, maibé “paun” serbisu nian. Jezús revela nia an nu’udar paun, katak esensiál, buat nesesáriu ba moris loroloron nian, lahó Nia buat la funsiona. La’ós paun ida entre paun sira seluk, maibé paun moris nian. Ho liafuan seluk, lahó Nia, liufali moris, ita liu: basá Nia de’it mak fó ai-han ba klamar, Nia de’it mak perdua ita husi aat ne’ebé ita mesak la konsege supera, Nia de’it mak halo ita sente domin maski ema hotu dezilude ita, Nia de’it mak haraik mai ita forsa atu hadomi, Nia de’it mak haraik forsa atu perdua iha difikuldade sira, Nia de’it mak haraik ba fuan dame ne’ebé ita buka, Nia de’it mak haraik moris ba nafatin bainhira moris iha rai ne’e remata, Nia mak paun esensiál moris nian.

“Ha’u mak paun moris nian”, Nia dehan. Ita para iha ilas furak Jezús nian ida-ne’e. Nia bele halo rasiosíniu ida, demonstrasaun ida, maibé – ita hatene – Jezús ko’alia ho ai-knanoik, no iha espresaun ida-ne’e: “Ha’u mak paun moris nian”, halo sínteze loloos ninia an tomak no ninia misaun. Sei haree iha tempu ikus, iha Han-Kalan Ikus. Jezús hatene katak Aman husu nia la’ós de’it atu fó han ema, maibé atu fó an rasik, silu an rasik, moris rasik, nia isin rasik, nia fuan rasik atu ita bele iha moris. Na’i nia Liafuan sira ne’e fanun iha ita maravilla ba don Eukaristia. La iha ema ida mundu ne’e nian, maski hadomi ema seluk, bele halo nia an sai hahán ba ema ne’e. Maromak halo ne’e, no agora halo, mai ita. Ita hafoun maravilla ida-ne’e. Mai ita halo hodi adora Paun moris nian, atu adorasaun hakonu moris ho maravilla.

Maski nune’e, iha Evanjellu,envezde hakfodak, ema eskandaliza an, lees hatais. Sira hanoin: “Jezús ida-ne’e ami koñese, ami koñese ninia família, nune’e oinsá mak nia bele dehan: Ha’u mak paun tun husi lalehan?” (kf vv. 41-42). Ita mós karik eskandalizadu: mai ita di’ak liu Maromak ida ne’ebé iha Lalehan hodi la tama iha ita-nia moris, enkuantu ita bele jere asuntu sira iha ne’e. Maibé Maromak halo an ba ema mai ha’u, ba ó, mai ita hotu, atu tama iha ita-nia moris. No nia iha interese ba buat hotu ita-nia moris nian. No Nia iha interese ba buat hotu ita-nia moris nian. Ita bele haktuir ita-nia afetu sira, serbisu, loron ba loron, terus sira, laran-susar sira, buat barak. Ita bele dehan buat hotu tanba Jezús hakarak intimidade ida-ne’e ho ita. Saida mak nia lakohi? Tau nia iha fatin daruak – Nia ne’ebé paun –, neglijénsia nia no tau sees nia, eh bolu Nia bainhira presiza nia.

Ha’u mak paun moris nian. Pelumenus loron ida dala ida ita hasoru malu atu han hamutuk; karik kalan, iha família, depoizde loron ida serbisu no estudu nian. Furak se, molok silu paun, konvida Jezús, paun moris nian, hodi husu ho simplisdade atu fó bensan ba buat ne’ebé ita halo no buat ne’ebé ita la konsege halo. Mai ita konvida Nia ba uma, harohan ho estilu “doméstiku”. Jezús sei tur iha meza ho ita no sei halakon ita-nia hamlahan ba domin boot liu.

Atu Virjen Maria, iha-ne’ebé Liafuan halo an ba mane, tulun ita atu sai boot loron ba loron iha amizade ho Jezús, paun moris nian.