SELEBRASAUN BODAS DE PRATA

Dili – Iha loron 6 Agostu iha Irmán nain Lima; Ir. Ana Cesaltina, Ir. Angelita Gomes, Ir. Maria Brigida, Ir. Carolina Maria no Ir. Lucia Pereira selebra sira nia tinan Jubilario de Prata. Iha tinan 25 nia laran sira saran-an ba Maromak hodi sai FMA. Selebrasaun solene Bodas de Prata ne’e hahu ho selebrasaun Eukaristia ne’ebe  Padre Ispetor Salesiano nian, Pe. Apolinário Maria Neto, SDB mak preside. Iha salaun São João Paulo II Komoro. Ne’ebe partesipa mos husi Irmán FMA sira, formande sira no Irmán nain 5 nia familia balun.

Loron ksolok no gratidaun ne’e lori fali ita atu hanoin kona ba Maromak nia grasa ne’ebe halao ona iha Irmán sira ne’e nia moris. Ita hateke fali ba Maromak nia bolun ba sira ida-idak no oinsa sira ida-idak hatan no halao bolun ne’e iha sira nia moris durante tinan 25. Hare sira nia istoria lori ita atu agradese Maromak ne’ebe akompaña ona sira to’o ohin loron hodi selebra sira nia Jubilario iha vida konsagrada iha Istituto Filhas de Maria Auxiliadora. Ita agradese ba sira nia dedikasaun hodi Maromak iha labarik no foinsa’e sira no ema hotu ne’ebé Na’I entrega iha sira nia liman durante tinan 25 nia laran. Ho roman no serteza ne’ebe sira hetan husi Maromak Ni alia fuan iha Sagrada Eskritura, tulun no domin husi ema oi-oin halo sira aten brani hodi hakat liu dezafio no provas oioin hodi ho ksolok agradesimentu nian iha fuan selebra loron especial ida ne’e. sira nia agradesementu ba ispetoria Filipina hahu husi Me. Ana Maria Matuissi, Me. Lina Chiandotto, Me. Felicidade, Me. Sara Garcia, Me. Mabel Pilar. Sira agradese particular ba Madre FMA Missionaria dahuluk sira; Me. Paola Batagliola no Me. Maria Fé Silva ne’ebe kuda espiritu Valdoco no Mornese iha rai Timor. Agradese ba Me. Lurdes Pino, Me. Alma Castagna Ispetora atual, ba superiora sira hotu ne’ebé lao ho irmán sira ne’e durante tinan 25 nia laran. Agradese ba Formadores sira hotu iha pasadu no presenti ne’ebé akompaña no hola parte iha irmán sira nia fidelidade husi parte FMA no SDB, irmán maluk sira, familia, parenti doben sira no foinsa’e sira hotu. Agradese ba Padre Salesiano sira ne’ebé suporta Irmán sira ne’e Espiritualmente; Pe. Elizio Locatelli, Pe. João de Deus (Matebian), Pe. Rolando Fernandes, Pe. Agostinho Soares no Padre sira seluk.

Tinan 25 ne’ebé Irmán nain lima oferese on aba Maromak mak tinan produtivo iha sira nia moris. Sira fo sira nia tempo ne’ebe nakonu ho enerjia no saude diak atu halao Maromak nia servisu. Sira hetan grasa no tulun barak husi Maromak no ema sira ne’ebe Maromak indika ona atu tulun sira. Sira mos iha tempo sira ne’e ho sira nia moris ne’ebe nakonu ho grasa no dezafiu sira tulun ona foinsa’e no labarik wain ho sira nia influensia diak sira, sira ksolok, domin, amizade, liafuan no sasin moris nian ne’ebe halo foinsa’e barak hetan future ne’ebe diak. Sinal katak grasa ne’ebe sira simu sira kontinua hasuli ba hirak ne’ebé sira hasoru. Ida ne’e soi duni atu agradese.

Iha okaziaun ne’e, iha Me. Alma nia mensajen ba Irmán nain 5 ne’e selebra sira nia Jubilario iha loron solenidade Transfigurasaun nian, Madre dehan: “ohin ita haksolok ho Irmán nain Lima hodi agradese Maromak ba fidelidade ne’ebe Maromak iha ba sira durante tinan 25 nia laran. Iha momentu furak ne’e hau hakarak hato’o hau nia hanoin iha pontu rua ba Irmán sira; dahuluk mak hare ba solidade Jesus Nia nakfilak-An, iha leitura sira koalia barak kona ba naroman. Ahi ne’ebe lakan iha Antigu testament, Jesus ne’ebé nakfilak-An sai naroman no Nia hatais sira nabilan. Hanoin ba roman sira ne’e hau hakarak hameno ba Irmán sira atu sai mos roman ba irmán maluk sira iha komunidade no foinsa’e no labarik sira iha misaun. Hatudu ba sira roman ne’ebe imi lori liu husi liafuan no hahalok. Daruak nian mak hau foti liafuan ne’ebé Papa Paolo VI ne’ebe hadomi liu Salesiano sira, wainhira iha enkontru sira mak nia hatene katak iha ne’eba iha Salesiano ka Salesiana sira, nia dehan Salesiano ne’ebé hau hadomi. Wainhira nia sei Arce Bispo iha Milano nia husu ba Salesiano sira iha Milano atu tau matan ba Kadeia. Fofofun Salesiano sira la simu. Maibe nia dehan ba sira: ‘Dom Bosco iha nia tempo tau matan ba Kadeia no ho nia laran maus no amorevolezza nia muda foinsa’e sira. Se imi iha laran maus no amorevelezza Dom Bosco nian, imi mos sei muda foinsa’e hirak iha kadeia.’ Tebes to’o  agora Kadeia ne’e Salesiano sira mak sei tau matan. Tan ne’e hau foti Amo Papa Paolo VI nia liafuan sira ne’e hodi dehan: ‘hau husu ba imi atu uza laran maus no amorevolezza iha imi nia komunidade no apostoladu.’ Obrigada barak”

Ita soi duni hamutuk ho Irmán nain Lima agradese ba Maromak bag rasa sidelidade nian ne’e. tamba Maromak nafatin fiel ba ita ema, maski ho ita ema nia frakeza buka atu la fiel Maromak kontinua fiel. Tamba ne’e mak durante tinan 25 Irmán nain lima monu hader maibe ohin sira selebra sira nia Bodas de Prata.

Obrigada wain.

(Noemia de Deus FMA)