Profisaun Perpétua 2021

Dili – Loron 5 Agostu mak loron Institutu nian, harii tinan 149 liubá. Iha aniversáriu ne’e, Irmán na’in lima Inspetoria FMA TIN nian halo kompromisu saran an ba nafatin ba Maromak: Ir Fatima, Ir Honoria, Ir Marta, Ir Martinha no Ir Onesiana.

Ba eventu ne’e halo selebrasaun eukarístika iha Igreja Parókia Maria Auxiliadora, Comoro,-Dili. Partisipante sira mak Irmán na’in lima nia família besik de’it, FMA sira ne’ebé halo Ezersísiu espirituál iha Dili no fomande sira, SDB balun.

Sira-nia lema mak “Hela iha ha’u-nia domin bá”, foti husi Evanjellu João nian. Padre Apolinário Neto, SDB, provinsiál ITM nian, iha omilia dehan katak “eziste uniaun íntima ho Maromak tanba eziste ukun-fuan domin”. Ita hela iha Maromak se ita hadomi tebes Nia! No padre Apolinário mós enkoraja Irmán neo-perpétua sira atu fiél nafatin ba Na’i nia domin, tau Nia iha ita-nia prioridade uluk liu.

Depoizde Missa iha almosu konfraternizasaun no konvíviu simples. Hanesan lisan iha Timor-Leste, depoizde bensan hahán, hahú kedas ho ko’a kek no loke champagne. Hafoin iha mós kumprimenta malu husi komunidade novisiadu, komundade Divina Providénsia, FMA sira ne’ebé halo retiru foin daudaun no FMA hotu iha Dili. Irmán neo-perpétua mós kumprimenta ho dansa no knananuk ida.

Iha liafuan ikus husi Inspetora FMA TIN, Ir Alma Castagna, fó hanoin kona-ba importánsia halo dalan kontínua. Nia foti ezemplu oinsá susar atu halakan lilin iha momentu Missa, bainhira Irmán sira jubileu tinan 25 pasa lilin ba neo-perpétua sira. Bainhira foin primeira profisaun, ema hanoin atu to’o ba perpétua. Bainhira perpétua ona, “husi ohin, ita husu ha’u-nia BA NAFATIN katak sá”.   Irmán Alma mós husu família atu kontinua harohan ba sira: “Família ohin haree sira-nia ksolok. Ita-nia responsabilidade, ninian nu’udar Irmán,  imi-nian nu’udar familiár sira atu hametin no apoia sira, halo ‘AHI-OAN’ IDA-NE’E, dalaruma ki’ik no dalaruma boot LAKAN NAFATIN”.

Husi parte família, iha Padre Graciano, pároku Balide no husi Cailaco, hatudu nia ksolok basá “depoizde tinan barak FMA sira hela iha Cailaco, ohin iha Cailaco oan ida ne’ebé hakotu lia ba nafatin atu sai konsagrada ba Maromak”.  Nia hein katak bainhira Irmán sira bele bá sira-nia parókia orijen, sira la bá halo festa de’it agradesimentu nian, maibé, halo mós “promosaun vokasionál”, basá furak no “di’ak atu foin-sa’e barak hili dalan saran an nian ba Maromak”, padre Graciano hatutan.

Maski tanba restrisaun sira husi estadu emerjénsia no regra sira covid-19 nian, partisipasaun sai limitada no festa sai sóbria, maibé sentimentu agradesimentu boot tebes no klima orasaun no familiariedade típiku espíritu salezianu nian manas nafatin.

(JG)